La XDLA denuncia que l’asturianu va quedar fuera de Netflix énte la pasividá del Gobiernu de Barbón

 

Netflix va doblar y subtitular al catalán, gallegu y vascu 70 producciones nesti 2022. En total, anguaño va haber 600 hores subtitulaes y 70 doblaes. Amás, van sumase títulos nuevos nos años vinientes cola subtitulación de series y películes internacionales y el doblaxe de títulos infantiles y familiares. Per otru llau, los Gobiernos autonómicos anunciaron que diben siguir trabayando con Netflix pa producir conteníos orixinales nos sos idiomes y incorporar a otres plataformes películes yá doblaes pola so televisión autonómica.

La llingua asturiana, otra vuelta pola falta d’oficialidá y énte la pasividá del Gobiernu d’Adrián Barbón, queda marxinada d’esti procesu y piérdense les posibilidaes de xenerar empleos nuevos nel sector del doblaxe. A esto hai que sumar que RTPA sigue ensin cumplir les sos obligaciones estatutaries de normalizar la llingua asturiana y d’atender al públicu más mozo.

La televisión asturiana lleva ensin doblar conteníos al asturianu dende’l 2017 -precisamente, la fecha del Congresu onde s’escoyó a Barbón como líder– y los asturianos siguimos ensin tener accesu a conteníos audiovisuales de toa triba nel nuestru idioma. Quier dicise, a pesar de les palabres bones, nesta llexislatura la voluntá real ye la mesma que la qu’hubo na llexislatura de Javier Fernández: cero voluntá y, en consecuencia, cero minutos de conteníos doblaos o subtitulaos al asturianu.

Esti mesmu fin de selmana va celebrase’l Congresu nuevu de la FSA, onde na so ponencia marcu van volver insistir nel fomentu del asturianu y el gallego-asturianu al traviés de RTPA, amás de fomentar la tresmisión interxeneracional del nuestru idioma. Sicasí, visto lo que pasó estos años, mieu tenemos a que too va quedar en papel moyao y que RTPA va siguir marxinando los conteníos del nuestru idioma énte la pasividá de Barbón y de la Conseyería de Cultura, que ta demostrando día a día la so incapacidá pa poner en marcha midíes normalizadores pa l’Asturies del sieglu XXI.