La XDLA pide al Gobiernu asturianu nuevu que la RTPA sía reflexu del cambéu de sensibilidá pa cola llingua asturiana

Hasta’l momentu, la cadena pública asturiana namás emitió -en más de diez años- siete películes doblaes al nuestru idioma, dexando de llau la importancia del doblaxe pa la normalización y normativización d’una llingua y los puestos de trabayu que xeneraría una industria dedicada a esos menesteres. Too parez indicar que la situación nun ta cambiando: nada se sabe de más doblaxes y vemos cómo la TPA ta promocionado programes nuevos. Toos en castellanu, lo que muestra que la cadena sigue cola so política de marxinación hacia’l patrimoniu llingüísticu d’esta tierra.

La TPA sigue marxinando los conteníos nel nuestru idioma y tratando al nuestru patrimoniu llingüísticu -nos más de los programes-, como una caxigalina que namás val pa facer chancia y pa los conteníos más d’andar per casa. Ye una situación qu’incumple sistemáticamente la Llei d’Usu y la Llei de RTPA.

Otra manera, l’usu de la toponimia oficial sigue incumpliéndose día a día, nun existe programación infantil n’asturianu y la RPA sigue asemeyándose a una radio local de Madrid, ensin presencia nenguna -quitando 5 minutos de llunes a vienres- del nuestru idioma. Mesmamente, la emisora pública nin emite música n’asturianu. Esta desconexón cola realidá cultural asturiana fai que güei RPA sía la radio xeneralista con menos oyentes n’Asturies.

Hai que recordar que na enmienda aprobada nel últimu Congresu de la FSA aprobóse que, mentanto nun se reformara l’Estatutu, diba fomentase la presencia de la llingua asturiana en RTPA desarrollando la Llei d’Usu. Lo que vimos hasta agora nun sigue per esi camín, polo qu’esperamos un cambéu na política de programación. Ye menester que la radio y la televisión pública sían un reflexu de la sensibilidá nueva pa cola llingua asturiana qu’existe na representación política mayoritaria na Xunta Xeneral, que tien qu’encarar yá un cambéu na dirección de los medios públicos y el desarrollu del mandato-marcu.