La Vuelta a Asturies vuelve incumplir la toponimia oficial

Hai unos meses destacábemos que La Vuelta respetaba la toponimia oficial asturiana. Sicasí, nun podemos dicir lo mesmo de la Vuelta a Asturias, la nuestra Vueltina, que empieza güei n’Uviéu.

Nel llibru de ruta y nos perfiles de les etapes nun hai presencia nenguna de la toponimia oficial. Nel cartelu oficial hai un intentu d’incorporala, pero con pocu aciertu:

• Denominaciones dobles inexistentes («Llanes/Llanes» o «Pola de Lena/La Pola Ḷḷena»).
• Fallos ortográficos («Úvieu»).
• Formes non oficiales o inventaes («Benia de Onís» o «A Veiga d’Eo»).

¿De verdá ye tan difícil facelo bien?

Hai una mínima voluntá d’incorporar la toponimia oficial, pero la execución ye claramente insuficiente. Con voluntá y profesionalidá (o un mínimu rigor y asesoramientu), cumplir cola toponimia oficial ye una cuestión bien cenciella.

Pa la edición de 2026, recomendamos el buscador de toponimia oficial de Política Llingüística del Principáu d’Asturies.