La XDLA denuncia que los más de los conceyos nun usen la toponimia oficial nes sos propies páxines web

Los decretos de toponimia aprobaos afiten que los topónimos asturianos tienen la consideración d’oficiales a tolos efectos.
Depués del requerimientu fechu a toles conseyeríes del Gobiernu del Principáu d’Asturies pol incumplimientu de los decretos de toponimia aprobaos, la Xunta pola Defensa de la Llingua Asturiana (XDLA) pon agora’l focu nes páxines web de los 51 conceyos qu’aprobaron la modificación de la so toponimia y, tres un análisis percompletu, el resultáu ye esmolecedor: namás siete d’esos conceyos utilicen los topónimos oficiales nes sos propies páxines web, al marxe de que tengan o non versiones en llingua asturiana o gallego-asturianu; los otros 44 conceyos incumplen nelles la llegalidá toponímica.

Los decretos de toponimia aprobaos afiten que los topónimos asturianos tienen la consideración d’oficiales a tolos efectos

Depués del requerimientu fechu a toles conseyeríes del Gobiernu del Principáu d’Asturies pol incumplimientu de los decretos de toponimia aprobaos, la Xunta pola Defensa de la Llingua Asturiana (XDLA) pon agora’l focu nes páxines web de los 51 conceyos qu’aprobaron la modificación de la so toponimia y, tres un análisis percompletu, el resultáu ye esmolecedor: namás siete d’esos conceyos utilicen los topónimos oficiales nes sos propies páxines web, al marxe de que tengan o non versiones en llingua asturiana o gallego-asturianu; los otros 44 conceyos incumplen nelles la llegalidá toponímica.

Amás de felicitar a los conceyos que con naturalidá faen lo que tienen que facer, quier dicise, cumplir la llegalidá al usar los topónimos oficiales nes sos web institucionales, tenemos que denunciar a los que, seya pola dexadez, pola inorancia o pola incompetencia de los sos responsables, nun la cumplen de la mesma forma. Denunciamos tamién la connivencia nesta illegalidá de los sucesivos gobiernos asturianos que, sabedores d’esta situación, nun fixeron nada en tou esti tiempu pa pone-y final.

Esiximos el cumplimientu estrictu de la llei a tolos conceyos que tienen el decretu toponímicu aprobáu, non namás nos testos de les sos páxines web, sinón en tola documentación municipal, na retulación de les dependencies de la casa conceyu, nos lletreros de la rede viaria, nos mapes y planos oficiales, y en cualquier ámbitu que visibilice los topónimos oficiales. Esiximos que l’alministración asturiana exerza´l so llabor de tutela, vixilancia y control del cumplimientu de la llegalidá, colos mesmos mecanismos qu’implementa pa les demás normes.

Exisimos tamién que dende la Conseyería d’Educación, Cultura y Deporte s’impulse’l trabayu de la Xunta Asesora de Toponimia y s’entaíne nel procesu d’aprobación de los 27 decretos de toponimia que queden pa completar el territoriu asturianu. La Llei d’usu y promoción del asturianu ye de 1998, pero nun foi hasta’l 2005 cuando s’empezaron a aprobar los primeros decretos d’oficialización toponímica. Y si ye verdá que’l procesu foi a bon ritmu nos seis primeros años (unos ocho decretos cada añu), nel 2011 y 2012 yá nun hubo más qu’ún cada añu, nel 2013 nengún y, no que va d’anguaño, namás otru. Paez lloñe l’oxetivu de tener tolos decretos de toponimia aprobaos nesta llexislatura.

Pa la XDLA la situación del usu de la toponimia oficial nos conceyos ye inaceptable y indignante. Hubo tiempu abondo p’adaptar les páxines web a los decretos (en dalgún casu, nueve años) y amás munches fixéronse depués d’aprobaos. Ye un xestu que nun cuesta dineru, namás la voluntá de llevalu alantre. Pa detrás, munchos conceyos tienen servicios de normalización que yá tienen esi trabayu fechu. Esi desdexamientu demuestra’l pocu compromisu de los gobiernos municipales col caltenimientu d’esta parte del patrimoniu llingüísticu y cultural.

La XDLA va dirixise a caún de los alcaldes de los conceyos incumplidores de la llei pa pidi-yos que corrixan les sos páxines web pa que se pueda ver la toponimia llegal y qu’amás entaínen cola adaptación de tolos lletreros, mapes, planos y documentación municipal a la toponimia aprobada nos decretos d’oficialización.

Publicaciones Rellacionaes:

La XDLA denuncia que los lletreros nuevos de la N-634 nun cumplen cola toponimia oficial La oficialidá del asturianu va suponer una industria que xenerará perriba del 2 % del PIB y más de 10.000 empleos La XDLA reclama al Conceyu d’Avilés más visibilidá pa la llingua asturiana al traviés de les webs municipales y les sos redes sociales