La oficialidá espera nes cais d’Uviéu.

Yá, sabémoslo de sobra. La reivindicación d’una llingua, pa bien ser, tien que se facer tolos díes. Primero falándola y escribiéndola siempre, claro, non namás en fiestes de guardar. Y falándola colos fíos y fíes, nietos y nietes, pa qu’ésta se tresmita y se siga falando nel futuru. Y aprovechando cualquier presencia en redes sociales, en medios de comunicación, en publicaciones de toles menes, n’actos públicos… pa usala y ayudar a que seya más normal na sociedá. Nun ta de más recordalo.

Pero hai ocasiones en que fai falta salir a la cai. Salir y dexar claro qu’hai una reclamación ciudadana n’Asturies que lleva décades pendiente. Que pasen los años y la vitalidá de les nuestres llingües propies ye cada vez más precaria. Que los avances qu’hubo nel so reconocimientu son ruinos en comparanza con tolo que fadría falta pa frenar el procesu de sustitución llingüística que tamos viendo en tiempu real. Qu’hai una parte importante de la sociedá asturiana a la que-y sigue dando más qué pase col so patrimoniu llingüísticu.

Por eso hai que salir a la cai dacuando. A xuntanos y dicir bien alto que l’asturianu y el gallego-asturianu tienen que ser oficiales, que les fuercies polítiques asturianes son responsables por nun se poner d’alcuerdu en toes estes décades pa iguar esta inxusticia flagrante.

Esti sábadu 10 de mayu, a les 12 del mediudía, aguardámoste na Estación del Norte d’Uviéu pa manifestanos pola oficialidá de les nuestres llingües propies, pa defender los nuestros derechos.