Pasaron unos díes, pero tovía nun nos facemos a la idea que Damián nun ta con nós. Fomos a A Estrada a despidilu y a dar el nuestru pésame a la familia. Fomos tamién a llevar la bandera col corazón de colores que tanto-y gustaba, pa que quedara con él.
Damián Barreiro yera muncho más qu’un compañeru de la Xunta pola Defensa de la Llingua Asturiana. La so personalidá, la so actividá pública, diba más allá de la so militancia na nuestra organización, sabémoslo, pero esa faceta vital de compromisu llingüísticu yera una parte fundamental de Damián y gracies a ella pudimos conocelu, tratalu y querelu.
Ente los sos intereses taba’l papel de la televisión pública na normalización del idioma y ehí dionos muncho: conocimientu y perspectiva d’otres comunidaes billingües, espíritu críticu y una montonera d’idees y propuestes. Pero tamién nos dio una capacidá de trabayu escomanada… y munchu humor.
Pa una organización de xente voluntario, que depende de la implicación personal de mui poca xente, la falta d’un pegollu como él dexa la casa taramellando. Tamos viendo cómo nos recomponer y cómo nos despidir d’él recordándolu. Mentanto, queremos dar les gracies a toa esa xente que nos escribió estos díes o que publicó artículos nos medios y redes sociales falando de Damián. Esos mensaxes de ciñu dannos fuercia pa siguir y confirmen la buelga imborrable que dexa n’Asturies.
Dexa un Comentariu