La XDLA amuesa preocupación pola non celebración de la Feria de Llibru y del Discu n’Asturianu esti 8-S, una actividá que “da aire” a un sector que xenera bien puestos de trabayu y mueve la economía.
Queden poques hores pa que los asturianos celebren el día grande de la so tierra, una fecha que tendría que tar marcada pol emponderamientu de les nuestres tradiciones y la nuestra identidá. Bien ye verdá que, dexando de llau’l conteníu políticu que tendría que o podría tener esta xornada, la folixa itinerante del Día d’Asturies acueye amueses d’oficios y deportes tradicionales o de la gastronomía del país, dalgo qu’a la fin ye un exemplu más de la nuestra cultura y forma de ser. Amás, nos últimos años pudimos ver como se dexó de traer a “grandes estrelles” de la música española que poco o nada teníen que ver cola celebración y agora los músicos asturianos son los principales protagonistes. Amás, la cartelería y propaganda de la celebración yá ye, en dalgunos aspectos billingüe, dalgo no que tien muncho que ver les crítiques del movimientu de reivindicación llingüística. Sicasí, como puntu negativu, les promociones del 8 de setiembre nos medios de comunicación son namás en castellanu, nun agraviu comparativu claru hacia la llingua asturiana.
Con too, la principal crítica de la Xunta pola Defensa de la Llingua Asturiana ye qu’esti añu nun se va celebrar la tradicional Feria del Llibru y del Discu n’Asturianu, una actividá incluída nes celebraciones lúdiques del Día d’Asturies que permitía que les persones qu’acudíen a la localidá onde s’entamaba la xornada –unes 500.000 persones en Ribeseya nel 2010- pudieran comprobar la calidá y cantidá de la industria cultural n’asturianu. Un sector que xenera empléu y actividá económica y que fora d’actividaes como estes nun tien la visibilidá que tenía que tener pal gran públicu.
Nestos tiempos de crisis y recortes, cola cultura como una de les primeres afectaes pola época económica mala, nun se pue entender qu’una actividá entamada pol mesmu Gobiernu autonómicu –qu’ayuda pa la publicación de la mayoría de llibros y discos n’asturianu- nun permita qu’estos productos lleguen a tola sociedá y dexe de dar aire a la industria cultural n’asturianu; un sector que tamién mueve la economía al traviés de les multiples editoriales, discográfiques, imprentes, estudios de grabación, distribuidores… Y ye que la llingua asturiana tamién ye una gran industria que da trabayu a cientos persones de manera directa o indirecta. Por eso, en tiempos de crisis, necesita de l’ayuda de l’Alministración; qu’ésta permita la so visibilidá y ayude a la máxima difusión posible, dalgo a lo que nun podemos renunciar nunca y menos nestos tiempos. Los sectores que trabayen nos diferentes aspectos de la cultura son fundamentales p’asegurar el futuru mesmo d’Asturies, motivu principal a celebrar una xornada como’l Día d’Asturies.
Dexa un Comentariu