La programación ta cada día más alloñada de la idiosincrasia asturiana, lo que se traduz en menos audiencia.
Siguen estrenándose formatos nuevos y producción ayena en castellanu que les más de les veces nun llega al 1 %.
Como tolos años, na Selmana de les Lletres Asturianes, los y les televidentes pudimos ver una televisión pública más comprometida cola realidá llingüística d’esti país. Asina, emitiéronse películes, partíos de fútbol y noticies n’asturianu -anque nesti últimu casu fora namás pa informar sobre la propia llingua-. Otra manera, tanto na radio como na televisión hubo programes especiales centraos na temática d’esta Selmana -la lliteratura escrita por muyeres-. Mostróse que yera posible y que nun había más torgues que les ideolóxiques pa facer una televisión n’asturianu. Sicasí, y tamién como tolos años, desque acaba la Selmana de les Lletres, los y les televidentes volvemos tener una televisión que dexa de llau la cultura y la llingua de la nuestra tierra y, con ello, a nós, los asturianos y asturianes, que somos la so audiencia potencial.
Asina, nos últimos díes estrenáronse programes nuevos en TPA que tienen el castellanu como idioma vehicular. Espacios qu’amás nun tán contando col siguimientu del públicu -dalgún nun llega al 1 %-, lo que muestra la incapacidá de los xestores de la cadena -los vieyos y los nuevos- pa dirixir TPA. Una directiva que día tres día da exemplu de los sos conocimientos nulos sobre Asturies y sobre televisión, pero que perciben por ello unos sueldos millonarios. La prueba ta nes cifres d’audiencia de TPA, que yá nun lleguen al 5 % y que la asitien per debaxo de toles cadenes xeneralistes que se puen sintonizar nel nuestru país.
Programa infantil
Con too, pa cumplir la cuota y dar la imaxe de que faen dalgo, TPA anuncia la estrena d’un programa infantil n’asturianu, una reivindicación de l’audiencia dende hai años. Sicasí, nuna muestra más de los sos nulos conocimientos sobre televisión, la directiva de TPA confunde el formatu de programa pa neños col d’un programa onde salen neños. Dende la XDLA allegrámonos de la estrena de cualquier espaciu n’asturianu (sía cual sía’l formatu, siempre va ser necesariu), pero programación infantil n’asturianu ye series de dibuxos, xuegos, cantares y entretenimientu pa neños y neñes n’asturianu. Yá nos ochenta, a TVE nun se-y ocurrió vender “Juego de niños” como un programa infantil, porque nun lo yera. Val con saber con un poco de televisión pa dase cuenta…
RPA
Otra manera, nel casu de la RPA la situación ye tovía peor, porque a últimos del añu pasáu estrenáronse tres formatos n’asturianu, pero estos nun siguieron nel 2017. Nun parez que fora por falta de presupuestu, porque los programes en castellanu siguen ehí y, mesmamente, estos díes la radio pública estrena dos programes nuevos col castellanu como idioma vehicular. Una situación que rebaxa’l yá en por sí alarmante porcentaxe del 2 %, que ye lo que RPA taba emitiendo hasta’l momentu nel nuestru idioma.
Actualmente, RPA ye una emisora que dexa de llau la nuestra llingua y tamién la nuestra música, porque raru ye’l día nel que na cadena pue sentise un cantar n’asturianu, mesmo nos fines de selmana, onde más del 60 % de la emisión ye una radioformula dominada polos cantares en castellanu y n’inglés. La situación fai que l’audiencia nun s’identifique con una radio que diz ser asturiana, pero que nengún radioyente pue identificar como talo. La prueba ta na so audiencia tan probe.
Por too esto, la XDLA pide responsabilidaes al equipu directivu de RTPA y a los representantes públicos asturianos; los mesmos que firmaron un alcuerdu d’investidura y un plan de dignificación del asturianu que fala d’aumentar el porcentaxe d’emisión n’asturianu, los mesmos que pactaron el nomamientu d’Antonio Virgili y que repartieron los puestos directivos de la cadena. Valió yá de xustificar la marxinación a la que someten a la nuestra cultura y les audiencies irrisories con que RTPA ye una de les radiotelevisiones autonómiques con menos presupuestu.
Si hai presupuestu pa facer programes en castellanu de calidá duldosa, mercar telenoveles estranxeres que naide ve y duplicar el númberu de directivos, tamién hai presupuestu pa facer programes n’asturianu, pa contratar conteníos a les productores pequeñes y pa facer surdir asina un sector audiovisual asturianu competitivu. Lo d’agora ye un duernu pa cuatro, un duernu que pagamos toos y toes y que sufrimos día tres día -los que tovía tenemos gracia pa sintonizar la canal-.
Publicaciones Rellacionaes:
La xestión desastrosa de RTPA y la inacción del Gobiernu asturianu faen peligrar a la cadena pública y marxinen al asturianu
La XDLA califica d’insultu a los asturianos el patrociniu de RTPA a un conciertu d’Isabel Pantoja
La XDLA quier que la llei nueva de RTPA faiga posible asturianizar les emisiones y asina asegurar el so futuru
Dexa un Comentariu