La XDLA afirma que dedicar una partida de Política Llingüística pal usu del asturianu en TPA ye actuar como si RTPA fora un mediu priváu qu’emite en castellanu

El proyectu de presupuestos xenerales del Principáu d’Asturies pa 2018, dientro de la partida de la Conseyería d’Educación y Cultura, conseña 70.000 euros pa la promoción del asturianu en RTPA. Pa la Xunta pola Defenda de la Llingua Asturiana (XDLA) qu’una partida del presupuestu que dedica’l Gobiernu d’Asturies a la normalización del nuestru idioma vaya pa la radiotelevisión pública, que yá va recibir 23 millones d’euros al traviés de la Conseyería de Presidencia, ye dir contra l’Estatutu, la Llei d’Usu y la mesma llei de creación de RTPA, normes qu’establecen que los medios públicos tienen que ser una parte activa nel procesu de recuperación del patrimoniu llingüísticu del país.

Dar perres a una cadena pública pa qu’emita n’asturianu ye actuar como si esta fora un mediu priváu: ye dar por fechu que TPA y RPA son cadenes en castellanu y que pa facer daqué n’asturianu hai que poner perres. Too esto ye más sangrín cuando nos presupuestos, na memoría d’oxetivos de RTPA pal 2018, nun hai nenguna referencia a la promoción del asturianu y namás se recueye nun puntu que la radio pública asturiana “divulga la llingua asturiana”. Ye de reseñar qu’actualmente namás s’emiten en RPA 10 minutos n’asturianu de llunes a vienres. Pareznos que calificar esto de divulgar l’asturianu ye un insultu a la intelexencia, porque hai emisores privaes que-y tán dedicando más tiempu a la programación n’asturianu.

RTPA yá tien 23 millones de presupuestu y si con 23 millones hai perres pa facer programes en castellanu, mercar telenoveles, firmar convenios con multinacionales norteamericanes, contratar a productores madrilanes y, sobre too, pagar a los directivos nuevos qu’entraron esti añu, tamién tien qu’haber presupuestu dientro d’esos 23 millones pa facer programes n’asturianu. Dende la XDLA nun vemos el sentíu de dar perres a una televisión que por llei yá tien qu’emitir n’asturianu, pero que ta dirixida por xente que se niega a desenvolver la llexislación vixente y, mesmo, a usar la toponimia oficial asturiana.

Pa da-y sentíu a esos 70.000, la XDLA solicita a la Conseyería d’Educación y Cultura qu’esixa a la dirección de los medios públicos qu’esa partida se dedique integramente al doblaxe de dibuxos animaos n’asturianu. Sería la manera meyor d’actuar sobre un sector estratéxicu pal futuru del nuestru idioma; la mocedá. Asina, tendría que firmase un conveniu de collaboración cola TPA pa supervisar esos trabayos, amás de decidir, ente los productos a los que tien accesu la cadena al traviés de la FORTA, cuáles son los más afayadizos pa la so emisión pol so efectu normalizador. Too esto podría ser el güañu pa la creación del Serviciu Asturianu de Doblaxe, una entidá encargada de coordinar los doblaxes y supervisar los trabayos –de los que se van encargar empreses privaes-, amás d’avalar el modelu llingüísticu de los mesmos –que tien que cuidase con tol procuru-.

Namás asina -afitando unos criterios claros de calidá y continuidá-, podríemos entender que se dean 70.000 euros más a Antonio Virgili. Y ye que nestos últimos meses vimos a un conseyeru d’Educación y Cultura afirmando que RTPA diba dexar d’usar l’asturianu pa facer chancia y viemos a una mayoría de la Xunta Xeneral aprobando’l proyectu d’un plan de dignificación que falaba d’usar la radio y la televisión públiques como ferramienta de normalización llingüística. Sicasí, nada cambió. Y ye que Virgili y el so equipu siguen ehí, incumpliendu la llei y dirixente la radiotelevisión pública como’l so güertu particular, ¡pero vamos premialos con 70.000 euros! Polo menos que sía con garantíes y con un motivu claru.