Discursu manifestación lletres asturianes 2024

Llevamos trenta y siete años manifestándonos nestes feches de mayu. ¡Trenta y siete años! Un añu y otru, y otru, y otru… pa poner el ramu a la celebración de les Lletres Asturianes. Unes veces con más enfotu y otres con menos: viendo cómo s’abría una rendixa a la esperanza o asistiendo a un fracasu más de la nuestra clas política que nun ye capaz a ponese d’alcuerdu no que tenía que ser un consensu democráticu básicu.

Dende la Xunta pola Defensa de la Llingua Asturiana queremos davos les gracies a toos y a toes por volver participar nesta xornada reivindicativa, por ser parte d’esti ritu repetitivamente necesariu, nesti movimientu ciudadanu que, a pesar de los años, a pesar de les décades, demostró de sobra que ye neciu y que nun se da. Non, ¡nun nos damos y nun nos vamos dar!

Vamos cuntavos un secretu: tuviemos tentaos de garrar un discursu de la Xunta d’hai diez, venti, trenta años, y aprovechalu pa güei ensin dicivos nada. Quitándo-yos dalgún detalle concretu que dexe saber de qué contestu históricu ye, quiciás nun dibeis notar la diferencia porque les demandes siguen siendo asemeyaes; tamién los argumentos: reivindicar lo de casa, reivindicar la igualdá con otres comunidaes, refugar la esclusión, denunciar la intolerancia…

Nestes más de trés décades de reivindicación avancemos muncho en visibilidá social, sí, pero reculemos en vitalidá real, en númberu de falantes, porque la tresmisión xeneracional de les nuestres llingües, del asturianu y del gallego-asturianu, ta cuasi cortada. A eso xueguen, a allargar l’agonía. Y dícennos: “Esperái otro poco, a ver si nunos añinos… cuando la cosa tea pa la mano…”. Y pasen los años, pasen les décades, y siguen diciéndonos qu’agora nun toca, qu’agora nun se pue.

Venimos amás d’unos años intensos onde, vosotros y vosotres, fuistis quién a galvanizar a tola sociedá asturiana na busca de la respuesta definitiva a una aspiración de xusticia que vien dende la dictadura postrera. Estes cais d’Uviéu, como les de Xixón, tienen visto pasar nos últimos años dalgunes de les manifestaciones más grandes de la historia contemporánea d’Asturies.

El proyectu 2018 qu’entamó la Xunta pola Defensa de la Llingua Asturiana dio pie a un 21 d’abril na Plaza la Catedral y a un 6 d’abril nel Náutico que metieron nos corazones de la xente l’ardor y l’ánimu, la fuercia y l’enfotu. Y, otra vuelta n’Uviéu, un 16 d’ochobre lleguemos dende tolos llugares d’Asturies pa participar na que, si nun fuera pola mezquindá de parte de la nuestra clas política, pudo ser la última manifestación pidiendo la oficialidá.

Pero bien sabemos que tán fácil nun va ser. N’Asturies, cuando se trata de derechos, xusticia y llibertá, nada ye cenciello. Tenemos delantre’l mesmu conglomeráu ultra y mediáticu que lleva mediu sieglu tratando de facenos desapaecer del mapa. La movilización de la so maquinaria de basura y mentires foi escepcional. Son sabedores de que llograr derechos fundamentales llama depués a otres aspiraciones nueves, a otros horizontes nuevos.

La podrén de la intolerancia ta metío peles instituciones y pelos medios, y la pregunta ye: ¿qué van facer los que dicen defender la oficialidá?, ¿qué ye lo que van facer yá, agora mesmo? Nun val con dicir tar a favor y nun facer nada, nun val con ser mui favorable y abrazar les cadarmes ultres nos medios, na escuela y na sociedá. Nun val. Queremos firmeza, coherencia na política llingüística.

Derechos. Tamos falando d’eso: de dar derechos ciudadanos, d’enanchalos, non de recortalos. Agora tenémoslos recortaos, ruinos, probes… porque les persones falantes d’una llingua tiénenlo too a favor y les que falamos les otres, les que falamos asturianu o gallego-asturianu, tenémoslo too en contra. Nun ye abondo col usu ceremonial una o dos o trés veces al añu, nun ye abondo col requexu na programación, nun ye abondo con poner una traducción debaxo pa contentanos.

Yá lo diximos más veces y vais dexanos que nos repitamos: la igualdá de derechos nun tien que llevar detrás nengún axetivu. Nun hai oficialidaes amables nin oficialidaes gafes nin oficialidaes repunantes. Hai reconocimientu de derechos o nun lu hai. Nun queremos derechos de segunda. Queremos derechos, a cencielles.

Trenta y siete años…, pero siguimos. Falten munches persones que llucharon por ver feches realidá les nuestres reivindicaciones, pero xuntáronse otres más moces. Porque somos resistentes. El nuestru ye un movimientu de resistencia. Resistencia a desapaecer, resistencia a que nos roben el futuru. Queremos siguir usando estes palabres qu’aprendiemos en casa y que nos xunten cola memoria de los nuestros. Nun somos menos que naide nin lo nuestro ye menos que naide. Tenemos derechu y nun vamos arrenunciar nunca. Vamos siguir lluchando.

Nós vamos siguir, sí. Pero ¿qué va facer la nuesa clas política? ¿Qué van facer les nuestres representantes ehí, na Xunta Xeneral? ¿Qué va facer el PSOE? ¿Va dexar qu’Asturies siga careciendo un estatutu de segunda, del sieglu pasáu, y too por nun saber liderar la modernización que precisa? Esa modernización, ente otres coses, tien que poner fin a la discriminación del asturianu y del gallego-asturianu coles demás llingües del Estáu.

Lo que teníen que facer pa dar respuesta a esta demanda, pa satisfacer esta reivindicación histórica, nun nos cansa repetilo, ye impulsar un debate ehí, na Xunta Xeneral, pa que se pongan enriba la mesa los nuestros argumentos, pa obligar a los demás a posicionase, o al llau de la sociedá, de los sos derechos democráticos, de la xusticia… o al llau de la intolerancia y la reacción llingüicida. Sabemos que somos más y que tenemos razón de sobra. Y sabemos que vamos ganar esta llucha. Nun nos damos.