Va celebrase’l 14 d’ochobre a les 16.00 hores en Santuyano (Bimenes) y va haber dos pruebes: una llarga y competitiva de 16 km y otra non competitiva de 3 km.
Yá ta abiertu’l plazu d’inscripciones pa la I Carrera pola Oficialidá, entamada pola Xunta pola Defensa de la Llingua Asturiana y el Conceyu de Bimenes.
El sábadu 14 d’ochobre próximu, a les 16:00 hores en Santuyano (Bimenes), va celebrase la I Carrera pola Oficialidá, que yá tien les incripciones abiertes y que va valir pa reivindicar la oficialidá del nuestru idioma. Trátase d’una prueba deportiva entamada pola Xunta pola Defensa de la Llingua Asturiana y el Conceyu de Bimenes, primeru d’Asturies que declaró la oficialidá nel so territoriu.
La carrera va tener dos pruebes:
· Carrera llarga de 16 quilómetros con caracter competitivu y que va dar una vuelta peles trés parroquies del conceyu. Esta carrera tien un preciu d’inscripción de 10 euros.
· Carrera curtia de 3 quilómetros, non competitiva y abierta a tolos públicos. Esta carrera tien un preciu d’inscripción de 6 euros.
Los dos percorríos van tener salida y meta en Santuyano y el preciu inclúi derechu a participar na carrera, dorsal con chip, seguru, camiseta conmemorativa, avituallamientos y bolsa del corredor o corredora que la organización consiga de los patrocinadores.
Otra manera, va haber una entrega de trofeos (19:00 hores) pa los trés primeros clasificados, homes y muyeres, del percorríu de 16 quilómetros, mentes que pa la carrera de 3 quilómetros va haber troféu pal meyor home y muyer de la prueba.
Les inscripciones yá se pueden facer online na páxina web: www.cronocheck.es . El plazu p’apuntase a la carrera ye dende’l 12 setiembre a les 9:00 hores hasta’l 10 d’ochobre a les 24:00 hores.
Dexa un Comentariu