La marcha del 21 d’abril va tar amenizada por dos bandones de gaites, un grupu de pandereteres, una batucada y un soundsysten.
La escena sonora asturiana nunca quedó de brazos cruciaos nel so compromisu cola llingua y cultura d’esta tierra. Dende hai décades, la música vien siendo un preséu fundamental nel procesu de normalización de la llingua asturiana y los cantantes y músicos asturianos usaron la so voz y soníos pa reivindicar la oficialidá d’esta llingua, yá fora al traviés de la so participación nel Conciertu pola Oficialidá o faciendo cantares a costafecha pa concienciar sobre la importancia de que l’asturianu algamara l’estatus xurídicu d’oficialidá.
Agora, a pocos díes de la manifestación pola oficialidá del 21 d’abril -con salida a les 12.00 de la Estación del Norte d’Uviéu- los artistes asturianos vuelven dar un pasu más ayudando a promocionar la convocatoria, dando cuenta de la so importancia histórica y llamando a la sociedá asturiana a sumase a la mesma. Y too esto al traviés de dos cantares: ‘Agora’ y ‘Cantar pola oficialidá’.
El primeru ta interpretáu por Vito Álvarez y Xune Elipe, con música de Sergio Rodríguez y lletra de Pablo Texón. Trátase d’un tema que tien una parte interpretada en gallego-asturianu. Pa la so difusión, ‘Agora’ va tener un videoclip realizáu por Guillermu Fernandi que se va mover peles redes sociales. Nél, xugando con un álbum de semeyes, faise un percorríu pelos más de 40 años de reivindicación llingüística n’Asturies.
Per otru llau, nel ámbitu del folk muévese ‘Cantar pola oficialidá’, con lletra y música de Xuacu Amieva, gaiteru fundamental na recuperación d’esti instrumentu n’Asturies y que collaboró nel discu ‘Santiago’, del grupu irlandés The Chieftains, gallardonáu con un premiu Grammy.
Son dos temes que se complementen. Ún ta interpretáu por una muyer, musicalmente más contemporaneu y que pue llegar a un públicu mui amplio, y otru por un home, de calter más tradicional y que llega dende’l mundu del folk asturianu, como homenaxe a esti xéneru que llevó’l nome d’Asturies per tol Arcu Atlánticu.
AGORA
Tenemos una cita cola historia
y pa que nun se pierda na memoria.
Vamos salvar l’idioma ensin llerza
pa que tenga puxu, futuru y fuerza.
Ven con nós, qu’ensin ti nun somos quien,
porque agora tu yes imprescindible.
Llograr lo que pidimos ye posible
si tiramos toos nel mesmu sen.
Esti ye’l momentu, va ser agora,
queremoste con nós, esta ye la hora.
Esti ye’l momentu, va ser agora,
vamos toes xuntes, esta ye la hora.
Agora, agora, agora,
querémoste con nós, esta ye la hora.
Agora, agora, agora,
vamos toos xuntos, esta ye la hora.
Sabes que les cais esperen por ti
y que naide ha guardar los tos glayíos.
Vamos caminando toos xuníos,
la to oportunidá yá ta equí.
La llibertá llevamos por bandera,
lluchamos arguyosos p’algamar
que la mocedá pueda falar
aquello que-yos regaló la güela.
Este é el momento, vai ser agora,
queremoste con nós, vai ser el hora.
Este é el momento, vai ser agora,
imos todas xuntas, xa nun hai demora.
Agora, agora, agora,
querémoste con nós, esta é el hora.
Agora, agora, agora,
imos toos xuntos, xa nun hai demora.
CANTAR POLA OFICIALIDÁ
Vamos xuntos a cantar
xunciendo les manes p’algamar
que la nuesa llingua seya oficial.
Pa que nel futuru
los nuesos fiyos puedan esfrutar
de la propia cultura
y del so pegollu principal.
La nuesa llingua tan guapa,
tantu tiempu arrequexada.
Agora ye’l momentu
de que seya asoleyada.
Los nuesos güelos falaben
y tamién los nuesos pas.
La nuesa llingua asturiana
nun se pue desaniciar.
40 cantares pola oficialidá
Otra manera, en collaboración con musicasturiana.com, pa pone-y banda sonora a décades de llucha pola oficialidá, Spotify y YouTube van contar a partir de güei con una llista con una parte bien importante de los cantares que dende los años setenta vienen funcionado como banda sonora de la reinvindicación llingüística, mostrando asina’l compromisu qu’a lo llargo d’estos años tuvieron los músicos d’esta tierra col patrimoniu llingüísticu asturianu. Son un total de 40 cantares que van valir pa poner ritmu a la defensa de la igualdá ente tolos asturianos.
Los grupos y temes son:
- Dixebra. La danza
- Dixebra. Tolos Cartelos
- Skama la Rede. Si mio güela lo diz
- Skama la Rede. La pita de la xunta
- Músicos Pola Oficialidá. Fala!
- Músicos Pola Oficialidá. Un Pasu Alantre
- Músicos Pola Oficialidá. Arguyosu
- Músicos Pola Oficialidá. Ye Lo Que Nos Pasa
- Músicos Pola Oficialidá. Garra la Pallabra
- Músicos Pola Oficialidá. El Ramu del Día Les Lletres
- Músicos Pola Oficialidá. Nun Somos Llinguateros
- Músicos Pola Oficialidá. Agora
- Adizion Etilika. Fartos
- Adizion Etilika. Abre los güeyos
- Mala Reputación. Raigaños
- Gomeru. La mio llingua
- Fala Non Caduca. La so galbana
- Ásperos. Yá, yá, yá!
- Anabel Santiago. L’Asturianu ye mio patria
- Nuberu. Tiempu de nosotros
- Corquiéu. Pais Silente
- Avientu. Poltrona Nacionaliega
- K-Nalon. Quieren robame
- Llan de Cubel. Rigu esva
- Darbukka. A Fala Escuita
- Zona Oscura. Acuto
- Cave Canem. Cantares
- Xabel. El Bable
- Pedru Pereira. Sei d’Una Llingua
- Dellos Artistes. El cantar del vasu
- David Varela. N’Asturianu Sumes
- Lliberdón. Tamos Fartos
- Lliberdón. Garra’l Xirón
- Anabel Santiago. Asturies
- Felpeyu. La Pongueta
- Nuberu. Atiendi, Asturies
- Mala Reputación – Fálame
- Fala Non Caduca – Sáca-yos la llingua
- Brenga Astur – Queixúmenes de la Braña
- Fala non caduca – Saca-yos la llingua
LLISTA DE SPOTIFY: https://open.spotify.com/user/musicasturiana/playlist/2xHe1LyCHa1dp1Qc5SqFRx?si=mwfqpsRgTFe9b3UqqFCtfg
LLISTA DE YOUTUBE: https://www.youtube.com/watch?v=jPrmghr0MRA&list=PLa72Fu3R5GaP8iuAr5fCKV_pNOcOMWOUP&index=10
Actividá musical de la manifestación
Del mesmu mou, pa poner el ramu a toa esta actividá sonora, la manifestación del 21 d’abril va contar con animación musical a lo llargo del so percorríu. Asina, van participar dos bandones de gaites -una abriendo’l cortexu pola oficialidá-, formaos por interpretes de la mayoría de bandes de gaites d’Asturies.
Otra manera, a lo llargo del percorríu tamién van acompañar a los miles d’asturianos que se sumen a la manifestación un grupu formáu por decenes de pandereteres que van interpretar ‘El ramu del Día de les Lletres’, un cantar compuestu hai años pa manifestaciones anteriores con dalgunes cuartetes nueves, tanto n’asturianu como en gallego-asturianu, y que critica l’usu amenorgáu del nuestru idioma dende las instituciones públiques.
Y dexando de llau los sones más tradicionales y autóctonos, la manifestación del 21 d’abril tamién va contar con una batucada y los sos característicos ritmos de percusión y samba, y un soundsystem, qu’al meyor estilu xamaicanu va contar con una furgoneta que va acompañar el cortexu y que col so equipu de soníu va dir ambientando la manifestación con música. Y ye que la llucha pola oficialidá faise con allegría y esta ye la meyor manera de convertir el 21 d’abril na fiesta de la igualdá ente tolos asturianos.
Per otru llau, desque acabe la manifestación, les miles de persones qu’acudan a la cita van poder siguir cola reivindicación y la folixa nun conciertu que se va facer na Plaza de la Catedral. Van participar Tuenda (folk), Toli Morilla (cantautor) y L-R (postfolk).
Dexa un Comentariu