La XDLA y Xeira entamen una campaña pa reclamar a los Conceyos l’usu del asturianu y del gallego-asturianu

La Xunta pola Defensa de la Llingua Asturiana (XDLA) y l’asociación del Navia-Eo Xeira entamen una campaña conxunta pa facilitar a la ciudadanía que se pueda dirixir al so Conceyu pa reclamar l’usu del asturianu y del gallego-asturianu. La campaña tien el lema global de ‘Nel mio conceyu, na mio llingua’ (‘Nel meu conceyo, na mía llingua’).

Dientro d’esta noticia, tienes el modelu de solicitú pa descargalu.

La Xunta pola Defensa de la Llingua Asturiana (XDLA) y l’asociación del Navia-Eo Xeira entamen una campaña conxunta pa facilitar a la ciudadanía que se pueda dirixir al so Conceyu pa reclamar l’usu del asturianu y del gallego-asturianu. La campaña tien el lema global de ‘Nel mio conceyu, na mio llingua’ (‘Nel meu conceyo, na mía llingua’).

Los Conceyos son l’alministración más allegada a la ciudadanía y por eso puen cumplir un papel fundamental na defensa, recuperación y normalización de les llingües minorizaes. Así que les dos organizaciones ufren a les persones interesaes un modelu de solicitú onde se reclama un compromisu y implicación mayor de los Conceyu con esta cuestión.

Ente les midíes que se quier reclamar ta la traducción de la páxina web del Conceyu, la señalización d’edificios y dependencies del Conceyu, la oficialización de la toponimia tradicional o, nel so casu, la xeneralización del usu d’esa toponimia y l’usu de la llingua propia nes intervenciones públiques de l’alcaldía y les conceyalíes, amás de na cartelería y difusión de campañes y actividaes.

Nestos momentos, cuasi puen contase colos deos d’una mano les páxines d’entidaes locales que cuenten cola opción de poder navegar n’asturianu o en gallego-asturianu, un fechu que consideramos una falta de respetu hacia’l patrimoniu llingüísticu d’esta tierra y hacia los sos falantes. Lo mesmo pasa cola toponimia oficial o na visibilidá de les llingües propies en campañes y nel día a día de l’Alministración local.

Publicaciones Rellacionaes:

La XDLA entama una campaña nes redes pa que los asturianos muestren l’apoyu a la manifestación pola oficialidá La XDLA reclama recoyer nos presupuestos polítiques clares a favor del asturianu y del gallego-asturianu La XDLA entama una campaña pa reclamar a TPA dibuxos animaos n’asturianu.