La XDLA, en collaboración col Conceyu d’Avilés, presenta esti vienres 2 de mayu a les 19:30 na Casa la Cultura d’Avilés, y con entrada llibre, un actu perespecial pa la organización, el nuestru homenaxe particular a Damián Barreiro, periodista y referente na cultura popular n’asturianu y, perriba de too, compañeru de militancia y amigu. Damián dexónos hai cuasi trés meses y nesti actu quería recoyese una montonera d’elementos que-y prestaben, qu’analizó, o sobre los qu’escribió o creó conteníu audiovisual.
Precisamente esi espíritu de xuntar pieces d’ámbitos culturales diferentes dio’l títulu d’Universu Damián. Nel actu va tener un papel bien importante la escenografía y los audiovisuales y, enriba l’escenariu, la lliteratura y, sobre manera, la música. Del universu musical van ocupase artistes como Mariluz Cristóbal y Llorián García Flórez, Fruela 757, Algaire, Rodrigo Cuevas y Beatriz Rodríguez . De poner voz a esti Universu Damián va encargase l’actriz avilesina Natalia Nat, pero tamién van xubir al escenariu familiares y amigos y amigues de Damián.
Damián Barreiro yera muncho más qu’un compañeru na XDLA. La so forma d’entender la vida, el so compromisu col país y col idioma, trespasaben con muncho la militancia na organización. Pero foi precisamente nesa trinchera común onde lu conocimos meyor, onde compartimos trabayu, idees y rises, onde lu quiximos. Damián tenía un interés especial na importancia de la televisión pública pa la normalización llingüística, y nesi campu dionos muncho: conocimientu de lo que se facía n’otros sitios, visión crítica, idees fresques y, sobre too, una capacidá de trabayu fuera de lo normal. Y humor. Munchu humor d’eso que fai llevaderos los debates y les xornaes llargues. Nun colectivu como’l nuestru, que sobrevive namás col trabayu desinteresáu y voluntariu, cola entrega personal, perder a una persona como él dexa un furacu grande. Esti actu fíxose con esi espíritu de trabayu solidariu, con tola xente que lu quería. Nació cola voluntá de recomponese poco a poco, animaos por toles palabres d’afectu y recuerdu de tantes y tantes persones nestes selmanes. Universu Damián quier ser una despidida a una persona mui importante pa la XDLA, pero tamién ye una manera de face-y un homenaxe públicu. Animamos a tola xente a que s’allegue a Avilés pa vivir esa tarde una xornada d’amistá y alcordanza.
Dexa un Comentariu