Xunta Moza, la mocedá de la Xunta pola Defensa de la Llingua Asturiana, y Reciella, un grupu de families que trabayen la tresmisión xeneracional del idioma asturianu, entamen esti sábadu 20, a les 11:30 hores, nel Centru Social Ocupáu y Autoxestionáu La Madreña d’Uviéu, una actividá pa la rapacería na que’l polifacéticu actor Carlos Alba “Cellero” va facer un cuentacuentos n’asturianu pa neños y neñes d’hasta unos 7 años.
Dende Xunta Moza compartimos con Reciella la esmolición pola falta d’iniciatives y actividaes pa la xente menudo nes que l’asturianu sía la llingua vehicular de les mesmes. Anguaño nun se conoz iniciativa dala pa que lo más pequeño de la casa conoza la llingua propia d’Asturies. Sicasí, somos sabedores del procesu d’aculturización al que se ven sometíos los neños y les neñes asturianes cuando s’incorporen a la vida social, empezando mesmamente pol sistema educativu, nel que non solo nun se contempla l’usu normal del idioma nél, sinón qu’amás nin siquier l’asturianu apaez nel curriculum d’Educación Infantil. Amás, la RTPA nun emite nin un solo minutu de programación infantil n’asturianu, lo que convierte a la TPA na única televisión europea d’una comunidá billingüe que nun pon programación pa los más neños nel idioma propiu. Por exemplu, nes demás autonómiques del Estáu, TVG2 (Galicia) y Canal 9 2 (País Valencianu) dediquen cuasi’l 25% de la emisión a la programación infantil na llingua propia, mentes qu’en Cataluña (Canal Super 3) y País Vascu (ETB3) hai canales dedicaes dafechu a la mocedá.
Por too ello, paeznos mui necesario organizar actividaes pa la reciella nes que se faiga un usu natural y normal del asturianu. Estes iniciatives vienen a allumar un camín enforma oscuru pa les xeneraciones futures, agora que’l papel del asturianu queda nes tiniebles na nueva llei educativa de Wert.
Convidamos a grandes y pequeñes a participar d’esta actividá tan prestosa, siempre que los adultos vaigan acompañaos d’un menor que se responsabilice d’ellos.
Dexa un Comentariu