Picuote fala nes nuestres llingües

Esti fin de selmana participemos na III Fiesta de las Llinguas de Picuote, na Tierra de Miranda, un alcuentru entamáu pola asociación Frauga.
La Xunta pola Defensa de la Llingua Asturiana tuvo presente con un puestu de materiales, onde pudimos dar a conocer les nuestres campañes y actividaes y intercambiar esperiencies con representantes d’otres organizaciones del dominiu asturllionés y d’otres comunidaes llingüístiques.

Amás, el programa permitió afondar nel trabayu que se vien faciendo alredor de la tradición oral, la investigación y la lliteratura, asina como disfrutar de la música y la gastronomía mirandeses, demostrando otra vuelta más que les llingües viven al traviés de les persones que les falen, les tresmiten y les convierten en parte de la so vida cotidiana.

Dende la Xunta queremos agradecer a Frauga el convite y la organización d’un alcuentru tan necesario pa reforzar los llazos ente comunidaes que compartimos l’oxetivu de defender y dignificar les nuestres llingües.