La Xunta pola Defensa de la Llingua Asturiana llama a tola sociedá asturiana a volver demostrar l’apoyu masivu a la oficialidá

La Xunta pola Defensa de la Llingua Asturiana (XDLA), entidá que convocó hai un añu la manifestación pola oficialidá onde participaron 30.000 persones, llama otra vuelta a la sociedá asturiana a movilizase pa mostrar el so compromisu col nuestru patrimoniu llingüísticu

Esti sábadu 6 d’abril a les 18.00 hores, va salir de la Plaza de L’Humedal una manifestación pola oficialidá que ta llamada a ser masiva y que va acabar na Plaza del Náuticu. Ellí, la presentadora Sonia Fidalgo y l’actor Antonio Lobato van encargase de lleer el manifiestu final, mentes que la cantante Marisa Valle Roso y el DJ Fruela 757 van encargase de poner el ramu a la xornada reivindicativa con un miniconciertu. Pel momentu, la manifestación yá cuenta col apoyu de tolos sindicatos mayoritarios, amás d’una parte importante de los partíos políticos y del texíu asociativo asturiano. 

La Xunta pola Defensa de la Llingua Asturiana quier recordar que ye una organización con más de 30 años d’historia -fundóse en 1984- y que dende 1987 vien convocando movilizaciones que contaron col apoyu de miles de persones. Por eso, la organización fai un llamáu a tolos asturianos y asturianes pa que, como vienen faciendo dende hai 32 años, muestren l’apoyu a la igualdá de derechos llingüísticos ente tola ciudadanía y a un futuru dignu pal nuestru patrimoniu llingüísticu.

La oficialidá ye’l reconocimientu llegal del derechu que tien cualquier persona a usar llibremente la llingua propia d’un territoriu. La oficialidá ye un avance democráticu porque amplía derechos y llibertaes ciudadanes. N’Asturies tenemos dos llingües propies, l’asturianu y el gallego-asturianu, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d’otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu.

Nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l’Estatutu d’Autonomía p’aprobar la oficialidá y depués, con una Llei de Normalización, siguir un procesu adaptáu a la situación asturiana. Na llexislatura próxima, na Xunta Xeneral hai que poner remediu a un déficit democráticu que lleva demasiaes décades pendiente.

Publicaciones Rellacionaes:

La XDLA llama a tola sociedá a demostrar l’apoyu masivu a la oficialidá participando na última manifestación pola oficialidá La Xunta pola Defensa de la Llingua Asturiana llama a una nueva manifestación masiva pola oficialidá La Xunta pola Defensa de la Llingua Asturiana llama a una movilización masiva pola oficialidá