La Xunta pola Defensa la Llingua Asturiana ta acabante de dar anuncia de los ganadores de los Premios Andrés Solar na so XXVIII edición. Nesta ocasión el Pegollu foi, ex aequo, pa la formación musical Dixebra y pa la editorial Trabe. El Madreñazu foi, tamién ex aequo, pa los recortes en materia llingüística y a la “Llei Wert”.
Los Premios Andrés Solar algamen nesti 2012 la so XXVIII edición. Como nos sos 28 años de vida, los premios tienen una vertiente doble: per un llau, la Xunta premia a una entidá o persona que rescamplara pol so llabor en defensa o promoción del asturianu. Esti reconocimientu materialízase n’El Pegollu, que nesta ocasión quier reconocer el llabor incansable d’una formación musical, Dixebra, y una editorial, Trabe, que cumplen 25 y 20 años, respectivamente, como proyectos fundamentales pa entender el desarrollu cultural, social y económicu de la llingua asturiana nes últimes décades. Pol so apueste decidíu pola música y lliteratura a lo llargo de bien d’años, demostrando que l’asturianu ye una ferramienta útil y necesaria nel rellatu de la contemporaneidá d’Asturies, la Xunta pola Defensa de la Llingua Asturiana decidió concede-yos esti 2012 el Pegollu de los Premios Andrés Solar.
Los Premios Andrés Solar tienen tamién una versión negativa, que reconoz a la/es persona/es o entidá/es que rescamplaren pol so llabor negativu pa cola llingua asturiana. Esti dudosu honor represéntase con un “Madreñazu”, que na edición de 2012 va pa los recortes en materia llingüística y pa la “Llei Wert”. Y ye que nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu. No que cinca a la llamada Llei Wert, sola hai que dicir qu’introduz brutales modificaciones que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa. Por too esto, na Xunta pola Defensa de la Llingua Asturiana consideramos que son bonos merecedores d’esti antipremiu.
La entrega de los Premios va facese’l día 15 d’avientu a les 19:30 hores, nel Salón d’Actos del Antiguu Institutu de Xixón. L’actu va contar cola actuación musical de Dani Stylo que va facer reellaboraciones de temes históricos de Dixebra.
Tamién, como tolos años, depués de l’actu va haber una espicha nel chigre xixonés Canteli, la entrada val 20 euros. Pa dir, hai qu’acutar sitiu, y pa ello puedes llamar al 985229553 o mandar corréu a info@exunta.org, primero d’esti 13 d’avientu.
Dexa un Comentariu