La Xunta pola Defensa de la Llingua Asturiana critica la invisibilidá de la Selmana de les Lletres Asturianes dientro de la programación de RTPA

La organización afirma que la situación pon en dulda la supuesta visibilidá que-y quier dar el Gobiernu d’Asturies al nuestru idioma.

Hai selmanes, la Xunta pola Defensa de la Llingua Asturiana (XDLA) presentaba l’Informe sobre l’usu del asturianu en RTPA 2013, onde se facía repasu a la presencia del idioma y la cultura del país nos medios públicos y s’ufríen propuestes de meyora. Ente los temes trataos, la XDLA recordaba la presencia medíatica tan escasa de la Selmana de les Lletres Asturianes na programación de la canal y la radio públiques. Asina, la organización señalaba que nel 2012 nun se retresmitió la Xunta Estraordinaria de l’Academia de la Llingua Asturiana per TPA y que la presencia mediática de la Selmana de les Lletres Asturianes nos informativos foi cuasi nula. Desgraciadamente, la XDLA tien que denunciar que la situación d’anguaño foi la mesma.

Asina, l’informativu de la televisión pública nun consideró noticiables la salida a la cai de dellos llibros nel nuestru idioma que les editoriales del país publicaron coincidiendo cola fecha, mentes que dalgunos actos entamaos pol mesmu Gobiernu d’Asturies nin siquier foron noticia na emisora pública, dalgo que contradiz los postulaos colos que naz cualquier mediu de comunicación públicu y que pon en dulda la supuesta visibilidá que quier da-y l’Alministración al nuestru idioma, que nun lu promociona nos sos propios medios de comunicación. Ye de reseñar que nel TPA Noticias del mediudía del 3 de mayu nun hubo nenguna noticia que recordara a l’audiencia que yera’l Día de les Lletres Asturianes o que’l mesmu Gobiernu entamaba’l Día del Llibru y el Discu n’Asturianu. Sicasí, sí foi noticia un concursu de corte de xamón na Feria d’Abril de Piloña. L’anécdota muestra l’apegu a la cultura y al idioma que tienen los directores d’informativos y programadores de RTPA.

Otra manera, nel Informe sobre l’usu del asturianu, la XDLA recomendó a los responsables de RTPA que contemplaren la emisión per TPA d’actos como la celebración d’una gala dedicada a la música y la poesía n’asturianu, que se celebró nel auditoriu del Centru Niemeyer, o del I Certame de Teatru Escolar en Llingua Asturiana/Gallego-asturianu. Hai que felicitar a la cadena pola emisión de la gala del Niemeyer, el sábadu pela nueche. Sicasí, quedaron fuera otros actos que sí s’emitieron otros años, como l’actu institucional de la Xunta Xeneral o la Xunta Estraordinaria de l’Academia de la Llingua Asturiana. Amás, la RPA tampoco nun fixo nenguna emisión especial, anque tien una programación baxo mínimos, y tampoco nun decidió realizar nengún actu simbólicu, como podía ser programar namás música n’asturianu.

Per otru llau, hai selmanes, la XDLA recordaba que l’Ente Públicu pela primer vez contaba nel so archivu con entrevistes, tanto en radio como en televisión, a l’autora homenaxada na edición d’anguaño -la escritora valdesana Nené Losada Rico-, polo que podría utilizales pa realizar un programa especial sobre la so vida y obra. Asina, poníase d’exemplu a Galicia y la TVG, qu’esti 17 de mayu, Día das Letras Galegas, va retresmitir en directo l’actu de la Real Academia Galega y va programar un documental sobre la vida y obra del autor homenaxáu, Roberto Vidal Bolaño. Amás, la web de la CRTVG abrió una sección onde los usuarios puen acceder al material audiovisual del que dispón l’archivu de CRTVG sobre l’autor homenaxáu. Amás, la Radio Galega lleva selmanes emitiendo una programación especial pa conmemorar el 150 aniversariu de la publicación de Cantares Gallegos, de Rosalía de Castro. Too esto contrasta cola RTPA, que nun dedicó nin una pieza en TPA Noticias a informar sobre quién yera Nené Losada.

Publicaciones Rellacionaes:

La XDLA critica la incapacidá de la dirección de RTPA pa xestionar la programación Diez propuestes pa visibilizar la Selmana de les Lletres en RTPA Valoración del cumplimientu del ‘Protocolu pa la visibilidá de la Selmana de Les Lletres en RTPA’