La Xunta ente la creación de la especialidá docente

Ayeri tuviemos nuna reunión coles conseyeres d’Educación y de Cultura onde nos informaron del alcuerdu ente’l Principáu d’Asturies y el Ministeriu d’Educación pa reformar los decretos d’especialidaes docentes y facer posible la creación de les especialidaes d’Asturianu y de Gallego-Asturianu.

Dende la Xunta pola Defensa de la Llingua Asturiana recibimos esta noticia con satisfacción. Felicitamos a los equipos del Gobiernu asturianu y del Ministeriu que fixeron posible esti alcuerdu y compartimos l’allegría del profesoráu, que ve reconocida una reivindicación histórica. La creación d’estes especialidaes va dexar da-y estabilidá y reconocimientu al profesoráu y supón un avance importante pa la enseñanza de les nuestres llingües. Ye una mui bona noticia que pronto vaya haber profesoráu estable d’eses especialidaes en tolos claustros docentes d’Asturies.

Esti pasu nun pue facenos perder de vista l’oxetivu fundamental. La creación de les especialidaes docentes ye una midida necesaria, pero nun remplaza el reconocimientu xurídicu que namás garantiza la oficialidá.

Namás cola oficialidá van poder asegurase unos derechos llingüísticos plenos, una presencia normalizada del asturianu y del gallego-asturianu nel sistema educativu y nel conxuntu de les Alministraciones públiques, y unes condiciones equiparables a les de les demás llingües oficiales del Estáu.

Esti avance demuestra, una vegada más, que cuando hai voluntá política ye posible siguir dando pasos na dignificación de les nuestres llingües. Pero tamién confirma que la oficialidá sigue siendo’l camín imprescindible pa garantizar la igualdá de derechos de la comunidá asturfalante y gallego-asturianofalante.