La XDLA llama a participar esti xueves 7 de marzu na concentración n’Uviéu del profesoráu d’asturianu

La situación de la llingua asturiana na enseñanza ye mala, pero cola Llei Wert pue dir a peor.

La ufierta de l’asignatura d’asturianu nun ye universal nos centros educativos d’Asturies. Entá se dan práctiques illegales pa impedir la llibertá a la hora d’escoyela. L’alumnáu de secundaria obligatoria qu’escueye l’asignatura tien qu’optar ente estudiar asturianu o otra materia: ye optativa en cuenta de voluntaria. La so presencia nes enseñances postobligatories ye anecdótica. Tampoco nun se pue usar como llingua vehicular pa la enseñanza d’otros conocimientos. El profesoráu nun tien reconocida la especialidá pa la que se prepara, nun pue opositar pola especialidá d’asturianu nin algamar destín en places definitives. Nun hai nel organigrama de la Conseyería d’Educación, Cultura y Deporte nengún departamentu que se dedique a la promoción de la enseñanza del asturianu. Nin siquiera’l conocimientu de la llingua se reconoz como requisitu o méritu pa trabayar en puestos docentes o alministrativos de la propia Conseyería.

Depués de conocer los anteriores borradores de la LOMCE, la Xunta pola Defensa de la Llingua Asturiana (XDLA) yá alvertía de que la situación podía dir a peor, porque se prevé reducir la capacidá de les alministraciones autonómiques pa completar el currículu que dicta la propia llei, sobre manera naquelles comunidaes que nun tienen llingua propia declarada cooficial, como ye’l casu d’Asturies.

Yá censuremos daquella les intenciones de la conseyera d’Educación, que, en cuenta d’asumir la responsabilidá histórica d’impulsar la reforma estatutaria camín de la oficialidá del asturianu, pidía a lo fuino que se tuviera en cuenta «l’estatus especial de la llingua asturiana». Esi estatus especial, sabémoslo bien, ye la falta d’oficialidá y de derechos de la llingua asturiana y de la so comunidá de falantes.

El resultáu ye la inclusión d’un puntu na disposición adicional trixésimo octava del tercer borrador del proyectu de llei del gabinete del ministru Wert, dedicada a la llingua castellana, les llingües cooficiales y les llingües que gocen de protección llegal. Esi puntu diz que, nel casu d’ufiertase la llingua asturiana como asignatura, ha facese dientro del bloque que llamen asignatures de llibre configuración autonómica. Agora, l’encaxe de la llingua asturiana nel sistema educativu queda pendiente de lo que diga’l futuru decretu autonómicu que desenvuelva n’Asturies l’aspectu curricular de la llei. Garantíes, polo tanto, nenguna, porque nesti proyectu de llei los derechos y les garantíes son pal castellanu y pa les llingues que se fixeron cooficiales nos sos territorios.

Ensin entrar a valorar el recorte que tamién van carecer les llingues cooficiales si se llega a aprobar la llei tal como ta redactada nesti tercer borrador, tamos seguros de que’l sitiu de la llingua asturiana tenía que ser tamién el d’elles. El reconocimientu de la oficialidá del asturianu ye l’asignatura pendiente de los gobiernos d’Asturies llexislatura tres llexislatura. Polo que se ve, la conseyera actual, alliniándose cola actitú del so partíu contraria a la oficialidá, quier amestar el so nome a la llista de responsables públicos que pola so dexadez, inorancia, cobardía y falta d’altor políticu, dexaron ensin resolver la cuestión llingüística n’Asturies.

Sicasí, la XDLA nun va dexar de reclamar qu’esti cambéu llegal na normativa educativa del Estáu valga d’oportunidá p’ameyorar la situación de la llingua asturiana na enseñanza, aprovechando al máximo les posibilidaes d’esta llei nueva y de la Llei d’Usu y Promoción del asturianu. La normativa curricular autonómica que s’apruebe tien que garantizar que la ufierta del asturianu seya universal en tolos centros y tolos niveles educativos que regula la LOMCE: infantil, primaria, secundaria obligatoria y enseñances secundaries postobligatories, en condiciones de llibertá d’elección, y non d’optatividá compitiendo con otres asignatures como hasta agora; tien que valir pa desaniciar les práctiques discriminatories pa la llingua asturiana nos centros educativos de cualquier titularidá; y tien que prever la promoción real del asturianu nel sistema educativu, regulando tamién la posibilidá d’usalo como llingua vehicular p’aprender otres materies. Pa eso ye fundamental qu’haya un serviciu de normalización llingüística na Conseyería d’Educación, Cultura y Deporte.

Defendiendo estes idees, la XDLA va tar al llau del profesoráu d’asturianu, que convoca un actu reivindicativu na plaza de la Escandalera d’Uviéu pal xueves 7 de marzu, a les 18:30 hores. Llamamos a tola xente militante y simpatizante del movimientu de recuperación llingüística d’Asturies a secundar esta convocatoria.

Publicaciones Rellacionaes:

La XDLA llama a los diputaos y diputaes escoyíos esti domingu a trabayar dende’l primer día pa llograr la mayoría pa reformar l’Estatutu Cientos d’escolinos/es ensin profesoráu pola falta de previsión de la Conseyería d’Educación Xunta Moza participó esti sábadu 31 de marzu nuna protesta a favor de les llingües minorizaes en Baiona