La convocatoria de la Xunta pola Defensa de la Llingua Asturiana foi una vegada más un ésitu, pola cantidá de xente que participó na marcha, polos colectivos representaos, sindicatos, partíos y asociaciones a los qu’aprovechamos p’agradece-yos l’apoyu, y especialmente pola presencia de mocedá, non solo nel percorríu pela cai Uría, sinón na llectura del manifiestu de la XDLA y na actuación musical d’Algaire, que-y punxo’l broche d’oru a la xornada. La causa de la defensa de les llingües y los derechos de la comunidá falante d’asturianu y de gallego-asturianu tien más puxu que nunca. A pesar del parón institucional que nos quieren vender como insalvable, a pesar de los pasos atrás nel procesu de recuperación llingüística, sabémonos cola razón de la nuestra parte y tenemos el trunfu caldía más cerca.
La convocatoria de la Xunta pola Defensa de la Llingua Asturiana foi una vegada más un ésitu, pola cantidá de xente que participó na marcha, polos colectivos representaos, sindicatos, partíos y asociaciones a los qu’aprovechamos p’agradece-yos l’apoyu, y especialmente pola presencia de mocedá, non solo nel percorríu pela cai Uría, sinón na llectura del manifiestu de la XDLA y na actuación musical d’Algaire, que-y punxo’l broche d’oru a la xornada. La causa de la defensa de les llingües y los derechos de la comunidá falante d’asturianu y de gallego-asturianu tien más puxu que nunca. A pesar del parón institucional que nos quieren vender como insalvable, a pesar de los pasos atrás nel procesu de recuperación llingüística, sabémonos cola razón de la nuestra parte y tenemos el trunfu caldía más cerca.
Aparte d’esa demostración de fuercia, na XDLA damos por cumplíos dos oxetivos: el primeru, retratar otra vegada a los enemigos de la oficialidá como los enemigos del asturianu y de la cultura en xeneral. La estrema derecha y la derecha estrema y los sos intentos d’emporcar la opinión pública espardiendo’l so odiu y los sos prexuicios foron lo más aburriao pola xente que se concentraba na plaza de La Escandalera al final de la manifestación.
L’otru oxetivu, poner argumentalmente contra les cuerdes a los qu’apuesten por apostalgar la declaración de la oficialidá a la siguiente llexislatura, dando por inhabil l’añu llargu que queda de la presente. Reconociendo pela nuestra parte los efectos de la pandemia, o los de la guerra que tenemos a les puertes, sabedores de qu’hai prioridaes qu’atender, nun tragamos que pa lo último siempre quede’l reconocimientu de les llingües y los derechos llingüísticos de los asturianos y les asturianes, como quieren imponenos el PSOE y los qu’acombayen col partíu nel Gobiernu. Volvimos face-yos escuchar el lema que nos acompaña nes últimes manifestaciones: “nin un día más con un derechu menos”.
Prueba d’esi pesu argumental de la XDLA ye que’l presidente Adrián Barbón vio necesario salir al otru día de la manifestación a repetir el mantra de “tenemos 26 votos, fáltanos ún”, o l’otru de “nun hai oficialidá porque la derecha votó en contra”. Son falses les dos afirmaciones. Pa saber si hai 6 o 26 votos favorables, pa poder afirmar que tal o cual partíu va votar en contra tien que producise esa votación. Y esa tovía nun la vimos.
Dannos tamién la razón les declaraciones al otru día d’Adrián Pumares, de Foro Asturies, instando al presidente a presentar la so propuesta d’oficialidá si ye que la tien. Anque más bien paez la escenificación d’un órdagu poco creyible cuando nun pasaron nin cuatro selmanes desde qu’esti mesmu diputáu votaba en contra d’una proposición non de llei presentada por Podemos que pidía esactamente eso mesmo. Amás tampoco esclarió si nesi hipotéticu escenariu diba buscar l’alcuerdu o diba imponer otra vegada condiciones estrambóliques inasumibles pa los demás o que recorten les posibilidaes de l’aplicación futura de la oficialidá.
Con esti panorama nun podemos dexar de facer un llamáu al Conseyu de Gobiernu d’Asturies: que presente una propuesta de reforma del estatutu d’autonomía que recueya la declaración d’oficialidá. Ye la so potestá esclusiva y la so obligación. Ye amás una promesa electoral de la FSA. A tolos partíos democráticos representaos na Xunta Xeneral pidímos-yos que debatan, argumenten, enmienden, consensúen y terminen por aprobar una redacción definitiva del artículu 4 que-y ponga puntu final a una inxusticia histórica que padecen les asturianes y los asturianos. Cuando la voluntá del pueblu s’espresa tantes vegaes con madurez, los sos representantes d’anguaño tienen que tar al altor pa nun dexar esa reivindicación ensin respuesta. Nun hai razón pa esperar a otres elecciones.
Dexa un Comentariu