La XDLA convoca una concentración, el llunes 25 a les 12:00 de la mañana na plaza España, énte los nuevos ataques per parte de Delegación de Gobiernu, a los derechos llingüísticos d’Asturies.
El delegáu del gobiernu en funciones del PP vuelve atacar los derechos llingüísticos d’Asturies. Igual que nes últimes vegaes, l’oxetivu del so ataque son los fundamentos mesmos de la esistencia del idioma: l’usu llibre de la llingua d’unos/es vecinos/es cola so alministración más cercana decidíu democráticamente.
Na carta que s’axunta, Gabino de Lorenzo requier al conceyu de Noreña pa qu’anule la ordenanza d’usu del asturianu, aprobada recién. Nuna argumentación tautolóxica y falsera niega que’l asturianu pueda usase con normalidá pol conceyu y los/es sos ciudadanos/es por nun ser oficial, cuando otres veces afirma que nun puede ser oficial hasta que nun s’use con normalidá.
Esti círculu viciosu ye un intentu claru y desesperáu d’acabar cola llingua tarazando los pocos pero firmes avances que tán faciéndose nos conceyos nel camín hacia la normalización y hacia la oficialidá.
Pa denunciar esti esterminiu planificáu del nuesu idioma, la Xunta pola Defensa de la Llingua Asturiana convoca una
CONCENTRACIÓN:
EL LLUNES 25 DE XUNETU A LES 12:00
DELANTRE DE LA DELEGACIÓN DEL GOBIERNU D’ESPAÑA
(Plaza España)
Llamamos a tolos/es asturianos/es, a toles organizaciones polítiques y sindicales, a representantes na Xunta Xeneral y nos conceyos a acorpar con nós esi día pa dici-yos lo más enérxicamante que séamos quién que queremos la nuesa llingua reconocida llegalmente cola OFICIALIDÁ, queremos poder usar la nuesa llingua con LLIBERTÁ y NORMALIDÁ, en definitiva QUEREMOS PODER VIVIR N’ASTURIANU,
Dexa un Comentariu