Les midíes puen quedar en nada ensin una dirección xeneral de RTPA comprometida colos derechos llingüísticos
Les midíes puen quedar en nada ensin una dirección xeneral de RTPA comprometida colos derechos llingüísticos.
La selmana pasada aprobóse, con una mayoría mui cualificada, una Proposición non de llei na Xunta Xeneral sobre la presentación d’un plan de dignificación de la llingua asturiana pa debate en Plenu. Lo primero que rescampla ye’l contraste ente l’argumentación que se fai na esposición de motivos y l’articuláu posterior de la proposición. Na esposición de motivos recuéyese de manera acertada la falta de derechos llingüísticos que sufre Asturies y l’agraviu comparativu que supón que n’otros territorios sí tean reconocíos al traviés de la cooficialidá. Tamién se destaca lo inxusto, discriminatorio y antidemocrático d’esta situación que nun se pudo o nun se quixo iguar en toos estos trenta años últimos. Llama l’atención que la conclusión d’esti preámbulu nun sía la de tratar de solucionar d’una vez esta falta de derechos diendo camín del reconocimientu del estatus xurídicu d’oficialidá, sinón que se vuelvan a proponer midíes de “protección y impulsu” que nos párrafos anteriores reconociéronse “insuficientes y ineficaces”.
Depués de la esposición de motivos, espónense una riestra de midíes, d’alcance variáu, referíes al sistema educativu, los medios de comunicación y a la propia alministración. Ta claro que, d’aplicase y llevase alantre, seríen positives pal procesu de normalización llingüística del asturianu, pero ye la nuestra obligación destacar delles cuestiones que nos llamen l’atención:
-Nes midíes referíes a los medios de comunicación, plasma ver la vaguedá y inconcreción de la parte dedicada al ente públicu RTPA. La ferramienta de comunicación básica y principal d’Asturies, que tenía que tener un papel fundamental como vehículu de normalización social del asturianu, queda despachada con un oxetivu tan probe como’l de “impulsar l’ampliación d’espacios”, viendo que llevamos una década de porcentaxes ínfimos, tematizaos y marxinales. Ye inasumible que los derechos de la ciudadanía y el cumplimientu de les lleis queden a los deleres de los órganos xestores del ente y d’una dirección xeneral continuista na falta de rigor y compromisu col asturianu.
-Nes midíes del ámbitu educativu axúntese reivindicaciones que vienen faciéndose dende bien de tiempu como la Especialidá, el Grau, los proyectos pilotu de vehicularidá, modificaciones curriculares, etc., y que tendríen un efectu positivu na situación tan dramática del idioma nel enseñu. La negociación col MEC, que na llexislatura pasada nun dio nengún resultáu, ye una manera de nun encarar el tema de la oficialidá: les especialidaes de les otres llingües estatales existen porque son oficiales. La optatividá de la ufierta de l’asignatura tien que cambiar buscando un mecanismu que favoreza la voluntariedá d’elección y tien que reforzase la supervisión del cumplimientu pola inspección educativa. La situación actual ta llevando a la desapaición de l’asignatura en Secundaria. En cuantes a los proyectos d’unu vehicular, 10 centros son pocos pa dar cobertura a les esperiencies individuales que se tán faciendo dende va años y que sufren una situación d’allegalidá. Tamién s’echa en falta que se recueya l’usu del asturianu n’otros aspectos del trabayu del profesoráu como nos informes, formación, innovación, investigación…
-En cuanto a les midíes alministratives, saludamos que, por fin, depués de más de 17 años, se piense n’aspectos como la creación del reglamentu p’aplicar la Llei d’Usu, la culminación del procesu de recuperación toponímica, la estensión del conocimientu del asturianu ente’l personal funcionario, etc.
Como conclusión tenemos que volver a insistir nel desaxuste ente les motivaciones d’esta PNL y les acciones que se proponen al final. En tou casu, vamos tar sollertes a les acciones del Executivu pa dar cumplimientu a esti mandáu de la Xunta Xeneral y vamos vixilar el cumplimientu de toes estes midíes pa que supongan un camín ensin vuelta hacia’l reconocimientu plenu de los derechos de les persones falantes d’asturianu.
Dexa un Comentariu