L’usu na publicidá de la xornada, l’apueste pola industria cultural nes actividaes y la presencia del idioma dientro de la programación de RTPA tienen que ser claves nesta xornada tan simbólica.
L’usu na publicidá de la xornada, l’apueste pola industria cultural nes actividaes y la presencia del idioma dientro de la programación de RTPA tienen que ser claves nesta xornada tan simbólica.
Dientro de poques selmanes, los asturianos vamos celebrar el día grande de la nuestra tierra, una fecha que tendría que tar marcada pol emponderamientu de la nuestra realidá llingüística y cultural. Dexando de llau’l conteníu políticu que tendría o podría tener esta xornada, la fiesta itinerante del Día d’Asturies -qu’esti añu va celebrase en Colunga- acueye muestres d’oficios y deportes tradicionales o de la gastronomía del país, dalgo qu’a la fin ye un exemplu más de la nuestra cultura. Sicasí, amás de too esto, la Xunta pola Defensa de la Llingua Asturiana (XDLA) opina qu’esta fecha tien que ser la que marque l’aniciu de la política llingüística nueva del Executivu autonómicu, onde parez que s’asume la palabra normalización -en cuentes de la protección que pa poco valió-, amás de falar de la visibilidá del idioma nos actos públicos y la so presencia nos medios de comunicación.
Asina, los actos del Día d’Asturies tienen que tener como protagonistes principales a la xente que trabaya pola cultura d’esta tierra, dexando de llau les “grandes estrelles” de la música española que poco o nada tienen que ver cola celebración. La cartelería y propaganda tamién tienen qu’usar l’asturianu, pero non como una llingua de segunda. Y ye qu’estos años vimos cómo l’asturianu aparez de forma menos visible que’l castellanu, mentes que les promociones nos medios de comunicación son namás en castellanu, nun agraviu comparativu claru hacia la llingua asturiana. Si de verdá se quier normalizar, si de verdá hai un cambiu, tien qu’haber una discriminación positiva hacia la llingua que, de momentu, nun ye d’usu normal. Y esi ye’l casu del asturianu.
Nesi mesmu sentíu, ye bien importante visibilizar al máximu la Feria del Llibru y del Discu n’Asturianu, una actividá que permite comprobar la calidá y cantidá de la industria cultural n’asturianu. Un sector que xenera empléu y actividá económica y que fuera d’actividaes como estes nun tien la visibilidá que tendría que tener pal gran públicu. Y ye que la llingua asturiana tamién ye una industria que da trabayu a cientos de persones de manera directa o indirecta. Los sectores que trabayen nos diferentes aspectos de la cultura son fundamentales p’asegurar el futuru mesmu d’Asturies, motivu principal pa festexar una xornada como’l Día d’Asturies.
Per otru llau, nos últimos tiempos vien falándose de dar un reblagu a la presencia del idioma na RTPA. Amás, nos puntos recoyíos nel alcuerdu sobre política llingüística, hai un específicu sobre la RTPA que fala de medrar la presencia de la llingua y la cultura asturiana na programación. Nesi sentíu, la XDLA recuerda l’éxitu d’audiencia de les dos películes doblaes al nuestru idioma que s’emitieron el Día d’Asturies pasáu. Amás, esi día la cadena tuvo un 30% de la programación n’asturianu. Sicasí, anque la emisión de doblaxes parecía convertise nun clásicu d’esa xornada, llevamos meses ensin saber de más proyectos. Tampoco nun se sabe nada del apoyu de TPA a la industria audiovisual a pesar de los munchos curtiumetraxes y documentales rodaos n’asturianu y que, de momentu, nun s’emitieron na cadena. Queremos recordar que si se fala de potenciar l’usu del idioma na RTPA, los pasos tienen que ser hacia alantre; nun se puen dar pasos atrás. Ye hora que dexen de llau los sos complexos d’inferioridá y se comprometan con una televisión que de verdá pueda llamase asturiana.
Publicaciones Rellacionaes:
La XDLA pide a los partíos políticos que negocien un articuláu sobre la presencia del idioma na llei nueva de RTPA
La XDLA pide al Gobiernu asturianu nuevu que la RTPA sía reflexu del cambéu de sensibilidá pa cola llingua asturiana
Valoración del cumplimientu del ‘Protocolu pa la visibilidá de la Selmana de Les Lletres en RTPA’
Dexa un Comentariu