Discursu pola reconocencia de l’ALLA 2015

En nome de la Xunta pola Defensa de la Llingua Asturiana queremos dar les gracies a l’Academia, a los académicos y académiques, por facer esta reconocencia pública al nuestru llabor de reivindicación llingüística y de la oficialidá a lo llargo d’estos más de trenta años.

DISCURSU TEATRU CAMPOAMOR XDLA

 

 

En nome de la Xunta pola Defensa de la Llingua Asturiana queremos dar les gracies a l’Academia, a los académicos y académiques, por facer esta reconocencia pública al nuestru llabor de reivindicación llingüística y de la oficialidá a lo llargo d’estos más de trenta años.

 

Ye un honor bien emocionante pa la Xunta recibir esti reconocimientu de la máxima institución llingüística d’Asturies y ye una obligación compartilu con tola xente que sofita les nuestres acciones y actividaes.

 

Pero ta claro que pa nós tamién ye una responsabilidá y un compromisu pa siguir nel llabor y na llucha. Responsabilidá y compromisu qu’acoyemos y aceptamos ensin duldar.

 

Como sabéis, el fin y oxetivu de la Xunta pola Defensa de la Llingua Asturiana namás ye ún: asegurar la sobrevivencia del asturianu. Y p’asegurar un futuru al nuestru idioma son imprescindibles y necesaries una riestra de ferramientes. Ente elles dalgunes son xurídiques. La oficialidá ye una d’eses ferramientes llegales: el reconocimientu esplícitu de la igualdá de la ciudadanía a tolos niveles use la llingua qu’use. Esos derechos de les persones que falen asturianu nun puen ser negociables porque son derechos humanos básicos. Nun hai horizonte de futuru viable ensin aplicar lo que les disposiciones constitucionales estatales y internacionales afirmen. Les llingües, y l’asturianu ye una d’elles, tienen que ser oficiales pa poder sobrevivir. Nun hai espaciu pa interpretaciones, sides o estratexes electorales: ye la manera inequívoca d’asegurar los derechos dientro del ordenamientu xurídicu nel que tamos.

 

Por eso, a lo llargo d’años y décades venimos reivindicando de contino l’estatus d’oficialidá pal asturianu. Nun ye una palabra balera nin un mantra que nos consuele ante la neciura de los que gobiernen. Tampoco nun ye la solución a too. Ye’l primer pasu. Ye’l pasu inescusable pa entamar un plan de normalización qu’intente salvar la nuestra llingua pa les xeneraciones futures d’asturianos y asturianes.

 

Llevamos más de trenta años viendo cómo nun se fai nada eficaz p’afitar la tresmisión de la llingua. Les condiciones d’escepcionalidá, marxinalidá y arrequexamientu nes que los gobiernos asturianos somorguiaron l’idioma tán dando cómo resultáu lo que tenemos. La tresmisión interxeneracional frayóse: la reciella yá nun fala n’asturianu quitando mui poques escepciones. El ramu a esti procesu pónenlu los medios de comunicación y el sistema educativu, que son les ferramientes más eficaces al serviciu de l’aceleración brutal de la sustitución llingüística.

 

Y viendo esti panorama nun se fai nada que valga de verdá porque la nuestra clas dirixente nun quier, nun cree nello, nun-y da muncho más; debe tar a otres coses… Nestos años, los que teníen los medios nes manes pa tornar esi procesu de sustitución llingüística pasaron de la negación del fechu llingüísticu asturianu a la corrección política más pegañosa y mentirosa: la de la difusión, la protección, la promoción… Eses sí que son palabres baleres. Son cada añu menos de lo mesmo, como pudimos ver nesta llexislatura llamentabe qu’agora acaba. Ye aprobar topónimos que depués l’Alministración nun usa. Ye xestionar una enseñanza que dexen morrer añu a añu. Ye subvencionar llibros pa una población que desconoz la so existencia. Ye querer muncho l’asturianu una selmana al añu y depués nun volver a alcordase d’ello.
 

Revélase asina, nos más de los dirixentes que sufrimos estos años, la concepción museística y folclórica que tienen del idioma, que ye calcada, tan progres ellos, de la concepción tardofranquista, que munchos nin saben nin quieren superar.

Pero contra esti estáu de les coses siempre va haber otra Asturies. El llabor académicu ye un exemplu d’esa Asturies que trabaya pol asturianu, que lo estudia y lo investiga, que lo prestixa y visibiliza, que nos da ferramientes pa proyectalo al futuru.

Nós, na Xunta pola Defensa de la Llingua Asturiana, tamién quiximos dar voz a esa otra Asturies, sacar l’apreciu y l’arguyu de falar n’asturianu a les cais, esparder el convencimientu de qu’una Asturies que reconoza derechos, que respete la so llingua, va ser una Asturies meyor con un futuru meyor.

 

Nesti llabor de busca d’un futuru pal asturianu namás nos anima l’amor al idioma y la nuestra conciencia y compromisu como militantes d’un movimientu reivindicativu qu’esixe lo que ye de xusticia.

 

Nun queremos facer un repasu dafechu d’acciones y movilizaciones qu’entamemos nestos años. Munchos de los que tais equí conocéisles, munchos participastis directamente nelles.

 

Namás punximos el nuestru granín d’arena, la nuestra aportación al llabor descomanáu de salvar la llingua asturiana. Cuando dábemos la cara pola oficialidá, tábemos dándola por un futuru dignu n’asturianu.

 

Si dalgo podemos apuntar nel haber ye lo qu’ayudemos cola nuestra actividá a que la reivindicación llingüística fore un movimientu social reconocíu y reconocible que vertebra bona parte de la historia contemporánea d’Asturies. Y fixímoslo con una vocación apartidista, abierta a tol mundu, ensin protagonismos personales, pa que naide pueda poner sides pa nun echar una gabita nesti llabor que ye de toos y de toes. Nacimos abiertos a la xente y siguimos tándolo.

El repertoriu reivindicativu desplegáu nestos años poco tien qu’envidiar al de cualquier movimientu social del mundu que clamie por xusticia, derechos y futuru. Dalgunes de les acciones tán yá xustamente afitaes nel imaxinariu colectivu asturianu de les protestes populares y son patrimoniu de los movimientos sociales.

 

Manifestaciones, zarramientos, acampaes, encadenamientos, concentraciones, clases na cai, conciertos, debates, campañes… y hasta una pita mariella llevaron la reivindicación del tarrén estrictamente cultural o patrimonial al del reconocimientu de derechos fundamentales de la ciudadanía.

 

Y nesi llabor vamos tar siempre hasta que s’asegure la sobrevivencia del asturianu. Nesi llabor vamos tar impulsando la revolución democrática y de derechos que supón la oficialidá y el futuru pol que naguamos.

Vamos tar siempre demostrando’l compromisu íntimu cola llingua al trabayar, al falar cola reciella, al cantar, al depositar el votu….

Nun vamos pidir, vamos siguir esixendo.

Nun vamos cambiar cromos nin negociar lo que ye un derechu básicu. Vamos algamar, conquistar y consolidar derechos y futuru.

Porque…

Podrán arrequexar l’asturianu na tele, pesllar radios y periodicos.

Podrán quitar hores y precarizar una enseñanza tovía ensin Especialidá.

Podrán nun facer nada que mereza’l nome de política llingüística.

Pero nun van consiguir nunca que dexemos de lluchar, de falar y defender la nuestra llingua. ¡Va vaga-yos si piensen que nos vamos dar!

¡Tola xente xunto na defensa de la llingua asturiana!

¡Que puxe Asturies y que puxe l’asturianu!

¡L’asturianu, llingua oficial!