La XDLA denuncia l’ausencia del asturianu na imaxe pública del Principáu

L’Axencia Asturiana de Cooperación castellaniza la imaxe y la web de l’Axenda Cultural escaez l’asturianu

La Xunta pola Defensa de la Llingua Asturiana (XDLA) denuncia la castellanización de la imaxe de la que fuere Axencia Asturiana de Cooperación al Desarrollu y l’ausencia de versión n’asturianu na web agendaculturalasturias.es.

La XDLA plasma énte la castellanización de la imaxe de l’Axencia de Cooperación, dependiente de la Conseyería de Bienestar y Vivienda, que ta entamando a difundir nes sos comunicaciones un logotipu nuevu en castellanu cuando llevaba más d’una década cola so denominación n’asturianu. Como venimos denunciando, por desgracia, les muestres d’usu públicu del asturianu nes Conseyeríes respuenden a voluntaes polítiques individuales y concretes, y non a planes claros, tresversales y sistemáticos de normalización. Cuando llega un responsable al que nun-y da más la recuperación del asturianu (como ye’l casu), esta llingua, ensin más, desapaez de la Conseyería.

De la mesma manera, vuelve a sorprender negativamente que la llingua y la toponimia asturiana tean ausentes de la web agendaculturalasturias.es, acabante estrenar y xestionada pola Conseyería d’Educación y Cultura, y supuestamente dedicada a presentar la ufierta d’actividaes culturales. Nun val agora la sida de la falta de presupuestu, disponiendo como dispón esa Conseyería d’un Serviciu de Política Llingüística pa traducir los conteníos, nin ye posible que desconozan les formes oficiales de los topónimos qu’ellos mesmos aprobaron nel Boletín Oficial del Principáu d’Asturies hai años y que na mentada web nun se respeten.

Dende la XDLA esiximos la rectificación inmediata d’entrambes dos conseyeríes y l’usu públicu del asturianu como muestra del compromisu real cola so recuperación y normalización. Nun ye abondo con dicilo: hai que facelo.

Publicaciones Rellacionaes:

La XDLA denuncia que la web nueva del Institutu d’Alministración Pública Adolfo Posada escaez l’asturianu La oficialidá del asturianu va suponer una industria que xenerará perriba del 2 % del PIB y más de 10.000 empleos La xestión desastrosa de RTPA y la inacción del Gobiernu asturianu faen peligrar a la cadena pública y marxinen al asturianu