El grupu Misiva va dar un conciertu’l vienres, 22 de febreru, a les 21 hores nel Centru Social Ocupáu Autoxestionáu La Madreña d’Uviéu. Esti conciertu qu’entama Xunta Moza, organización de mocedá en defensa del idioma asturianu y perteneciente a la Xunta pola Defensa de la Llingua Asturiana, en collaboración col CSOA La Madreña, forma parte del actu d’entrega de premios del IV concursu lliterariu «Amor pola llingua» nel que la xente que concursa declara’l so amor pol idioma nun formatu curtiu de 140 caracteres al traviés de les redes sociales (Facebook y Twitter col hashtag #amorpolallingua), el corréu electrónicu (amorpolallingua@gmail.com) o’l corréu postal.
Misiva naz nel 2007 en Grau y ta integrada por Humberto a la voz, Diego al baxu, David a la batería y Oscar a la guitarra. La formación de punk-rock asturiana caracterízase por unes lletres contundentes y reivindicatives que canten les miseries de l’Asturies del sieglu XXI. Amás, nesta ocasión, van poder sentise les canciones nueves del grupu, por que ta acabante de salir el so últimu discu, Gran mentira.
La formación moscona collabora, otra vuelta, cola asociación de defensa de los derechos de los moces y mozos asturiano-falantes, Xunta Moza, nun actu folixeru y reivindicativu que quier poner de relieve les actitúes positives a favor del asturianu de la mocedá frente a una clas política prexuiciosa y acomplexada pa con esta realidá social y que nun acaba d’asumir con naturalidá lo que ye un fechu incontestable: la esistencia de la llingua asturiana y la necesidá de dotar a los sos falantes colos mesmos derechos civiles que tienen los falantes d’otros idiomes.
Xunta Moza quier agradecer la participación nesta cuarta edición del concursu «Amor pola llingua» y présta-y, non solo del éxitu nel númberu de participantes, sinón tamién la calidá lliteraria de los trabayos presentaos. La persona ganadora va dase a conocer nesti conciertu de Misiva y Xunta Moza va entregase un llote de llibros n’asturianu, amás de material de la organización (discos, camisetes, mochiles, material escolar, etc.).
Dexa un Comentariu