La XDLA refuga la «Llei Wert» y denuncia’l caos nel sistema educativu

Nel anteproyectu, presentáu hai unes selmanes pol Ministeriu, cuéntase menguar la diversidá curricular n’enseñu primariu, quitar la optatividá na enseñanza secundaria obligatoria y facer desapaecer itinerarios formativos.

La Xunta pola Defensa de la Llingua Asturiana refuga la «Llei Wert» y denuncia’l caos nel sistema educativu

 

La Xunta pola Defensa de la Llingua Asturiana refuga dafechu los planes del ministru d’Educación, Cultura y Deporte, José Ignacio Wert, pa la futura Llei Orgánica que nel Gobiernu del PP llamen «de Meyora de la Calidá Educativa», que va suponer tamién un ataque al enseñu de la llingua asturiana.

 

Nel anteproyectu, presentáu hai unes selmanes pol Ministeriu, cuéntase menguar la diversidá curricular n’enseñu primariu, quitar la optatividá na enseñanza secundaria obligatoria y facer desapaecer itinerarios formativos.

 

Esos recortes, amestaos a la mengua de l’autonomía de l’alministración educativa asturiana, que va pasar de poder decidir el 35% del currículum a namás el 25%, puen ser la sida pal Gobiernu d’Asturies pa consumar un ataque más al enseñu del asturianu, si acasu’l más grave, porque vien de quien tenía que tar pa defendelu.

 

Ta en peligru’l futuru de la enseñanza de la llingua asturiana porque, nun hai que lo escaecer, l’asturianu nun cuenta cola protección que-y daría l’estatus d’oficialidá. Y, pa enriba, n’Asturies nin siquiera hai un Gobiernu qu’apueste pola promoción del usu y la tresmisión xeneracional del nuestru idioma.

 

La situación actual de la enseñanza del asturianu ta bien lloñe de ser ideal. El PSOE fai gala de tar en contra de la oficialidá de la nuestra llingua, inorando que ye la protección llegal que necesita pa sobrevivir y pa reconocer los derechos llingüísticos de los y les falantes. La Conseyería d’Educación, Cultura y Deporte diríxela Ana González, que presume de nun falar nin escribir asturianu, fiel a los mandaos del so partíu. Y, anque se-yos enllena la boca prometiendo potenciar les posibilidaes de la llei d’usu y promoción del asturianu, siguen incumpliéndola sistemáticamente tamién en cuantes a educación: l’asturianu nun ta presente en tolos niveles educativos; nun se respeta la voluntá d’estudiar asturianu de tol alumnáu y de toles families que lo demanden; nun se reconoz la especialidá del profesoráu d’asturianu… En definitiva, tiense a la llingua asturiana nun situación de caos permanente y con un estatus d’inferioridá en comparanza con otres árees y asignatures.

 

Nun puen aprobar una llei que valga de ferramienta p’afondar nesa situación discriminatoria de la llingua asturiana na enseñanza. Por eso, dicimos NON los recortes na educación y NON a la llei Wert.