La XDLA pola defensa de la llingua asturiana pide responsabilidá a los partíos políticos pa sacar alantre una reforma del estatutu qu’acabe d’una vez cola marxinación llingüística.
Esta llexislatura, de la que yá pasó un terciu si llega a completar los cuatro años, nun pue convertise n’otra llexislatura fallida. Ye’l momentu de la responsabilidá. Yá tuvo bien d’aplazamientos y del “agora nun toca”. El movimientu de reivindicación llingüística lleva cuarenta años lluchando y bona parte d’ellos fíxolo con unos apoyos parllamentarios muncho más desfavorables.
Nun ye menester nengún exerciciu d’audacia estrema. Lo qu’hai que facer agora n’Asturies fíxose yá va cuatro décades, recién salíos d’una dictadura, nes demás comunidaes autónomes con una llingua propia diferente del castellanu: Galicia, País Vascu, Navarra, Cataluña, Valencia y Baleares.
La evolución nesti tiempu de cualquiera d’eses comunidaes en comparanza cola d’Asturies fala ella sola. Ye’l momentu de cambiar lo que ta claro que nun funcionó. Porque del pozu nun vamos salir cavando hacia abaxo.
Pidimos a tolos grupos parllamentarios un exerciciu de responsabilidá mínima: que dexen de llau los cálculos partidarios y l’enfrentamientu sectariu, y se pongan a trabayar nuna reforma estatutaria que nun pue esperar más. A la Federación Socialista Asturiana FSA-PSOE correspuénde-y la iniciativa, por ser el partíu del Gobiernu y amás tener l’únicu grupu parllamentariu col númberu necesariu d’escaños pa entamar un procesu de reforma. A los demás partíos correspuende apurrir propuestes y votos pa llevar esta reforma a bon fin. Nesi sen, aplaudimos cualquier iniciativa política que ponga enriba la mesa la urxencia d’una reforma estatutaria.
Ye’l momentu de saber si tamos énte la nueva política, o si tamos asistiendo a la vieya representación de siempre con actores más mozos.
#Oficialidá #YeAgora
Publicaciones Rellacionaes:
La XDLA pide a los partíos políticos que negocien un articuláu sobre la presencia del idioma na llei nueva de RTPA
La Xunta pola Defensa de la Llingua Asturiana pide a los grupos parllamentarios eliminar les rayes coloraes na negociación sobre la reforma del Estatutu
La XDLA crítica l’actitú represiva hacia l’asturianu na xornada electoral y pide a los partíos políticos pasos alantre pa iguar estes situaciones
Dexa un Comentariu