La Xunta pola Defensa de la Llingua Asturiana (XDLA) refuga la decisión de los grupos municipales del Conceyu de Valdés -PSOE, Cs, PP, Avanza Valdés y Foru- de llevar al Plenu una moción pa que tola toponimia del conceyu caltenga la forma acastellanada y deturpada al llau de la forma tradicional.
La Xunta pola Defensa de la Llingua Asturiana (XDLA) refuga la decisión de los grupos municipales del Conceyu de Valdés -PSOE, Cs, PP, Avanza Valdés y Foru- de llevar al Plenu una moción pa que tola toponimia del conceyu caltenga la forma acastellanada y deturpada al llau de la forma tradicional. La toponimia tradicional de Valdés ye oficial dende 2014 porque’l Conceyu la aprobó primero, pasu necesariu pa que’l Gobiernu la oficializara depués. Sicasí, nestos cincos años, les Alministraciones públiques nun usaron nunca esa toponimia, incumpliendo asina la llexislación vixente. Del mesmu mou, nesti tiempu tampoco Valdés comunicó al INE los cambios de los nomes de los llugares, como se pue ver si se comprueba’l nomenclátor.Y agora, de repente, danse cuenta de que tienen que cumplir la llegalidá usando «L.luarca» y nun-yos gusta.
La situación manca más cuando vemos que partíos como’l PSOE o Avanza Valdés -marca local de Podemos y IX- apoyen esta midida, cuando a nivel autonómicu apoyen la oficialidá y la recuperación del nuestru patrimoniu llingüísticu. ¿Esta ye la primer midida del alcuerdu en favor de la toponimia del que falaben PSOE y IX nel alcuerdu d’investidura que fixo a Adrián Barbón presidente d’Asturies? ¿Nun van dicir nada dende les direcciones de la FSA, Podemos Asturies y IX sobre lo que quieren facer los sos partíos en Valdés?
Per otru llau, nesa defensa de la denominación doble tamién tán les formaciones de dereches. ¿Quieren que L.luarca sía tamién oficialmente «Luarca» pa facer como n’Uviéu, onde hai la denominación doble ye oficial y dende’l Conceyu nunca usen la forma tradicional? Que nun quieran engañar con un apueste falsu pol billingüismu; nun ye más qu’odiu hacia la llingua asturiana y complexu d’inferioridá.
Dicen amás que recuperar el topónimu deturpáu supón “abrise al mundu” y que ‘Luarca’ ye una marca turística conocida en toa España. Con esi «cosmopaletismu» demuestren que nun saben que namás dende’l respetu a la cultura local s’algama l’universalismu, porque ésta si ye orixinal y de personalidá propia. Como dicía’l Padre Galo, un valdesanu universal que llevó’l nome del so conceyu per tol mundu, “Si a Cadavéu tu nun chegas / you a L.lubarca nun chegu”.
Pidimos al Gobiernu asturianu y, en concreto, a la Conseyería de Cultura, que nun dean nengún pasu atrás col procesu de recuperación de los nomes tradicionales de los llugares d’Asturies. Ye’l momentu de mostrar l’apoyu al trabayu de la Xunta de Toponimia, basáu nel llabor d’espertos y que cuntó col consensu de toles fuercies polítiques de Valdés, eses qu’agora se desdicen de lo qu’aprobaron va cinco años.
Publicaciones Rellacionaes:
La XDLA denuncia qu’el Conceyu de Xixón ta desaniciando la toponimia tradicional de tolos lletreros de la zona rural.
La Xunta pola Defensa de la Llingua Asturiana pide a los grupos parllamentarios eliminar les rayes coloraes na negociación sobre la reforma del Estatutu
Acción: #OFICIALIDÁ con toles lletres, en CANDÁS
Dexa un Comentariu