Discursu XXX Premios Andrés Solar

Munches gracies a toos y toes por venir a compartir con nós estos 30 años de los Premios que lleven el nome del militante y compañeru Andrés Solar. Gracies especiales, como siempre, a la familia d’Andrés, que siempre ta equí. Ye guapo ver que por más que’l tiempu pase, l’alcordanza, la memoria del compromisu d’Andrés, que ye tamién el nuestru, nun pasa, nun s’escaez. Ye guapo ver cómo nesti actu facemos renovación del arguyu de pertenecer al movimientu de dignificación de la nuestra llingua y la nuestra cultura, del arguyu de lluchar por un futuru meyor y necesariu p’Asturies.

(Semeya gracies: Revista Vërtigu)

Munches gracies a toos y toes por venir a compartir con nós estos 30 años de los Premios que lleven el nome del militante y compañeru Andrés Solar. Gracies especiales, como siempre, a la familia d’Andrés, que siempre ta equí. Ye guapo ver que por más que’l tiempu pase, l’alcordanza, la memoria del compromisu d’Andrés, que ye tamién el nuestru, nun pasa, nun s’escaez. Ye guapo ver cómo nesti actu facemos renovación del arguyu de pertenecer al movimientu de dignificación de la nuestra llingua y la nuestra cultura, del arguyu de lluchar por un futuru meyor y necesariu p’Asturies.

 

Si Andrés nos pidiere cuentes de lo que fuimos a facer nestos 30 años, habríemos pidi-y benevolencia al xulganos porque poner punximos, ponemos y vamos poner al serviciu de la causa de la supervivencia del asturianu tol alma, tol empeñu, trabayu y intelixencia que seamos quien… Pero sabemos que nun ye abondo, nun ta siendo abondo. 

 

Con una presencia precaria y marxinal nel sistema educativu, nos medios de comunicación y na propia alministración la llingua ta, más ceo que tarde, condenada. A too ello, súmense les estructures demográfiques asturianes que van facer que nos encontremos, dientro de quince o venti años, con una población menguao en xeneral, y en particular na xente más mozo.

 

 

El llabor de la reividicación moderna del asturianu, que fai yá 40 años, supunxo una ruptura na concepción qu’hasta esi momentu se tenía del idioma. Nestos años lleváronse alantre procesos de normativización y normalización social con un éxitu relativu. Púnxose tamién en marcha una lliteratura y una música fecha nel nuestru idioma. Y too esto tuvo que facese en munchu menos tiempu qu’otres llingues, con un apoyu institucional cobarde y nuna comunidá de falantes que nun tien reconocida una mínima igualdá de derechos. Y fíxose, facémoslo, contra reló, contra la perda continua de xente que fala asturianu y nun estáu de coses onde la tresmisión xeneracional ta cuasi rota. Por eso estos cuarenta años tamién paecen, en parte, cuarenta años perdíos. 

La llucha ciudadana esfronóse siempre contra la muria de tibieza de l’Alministración, más dispuesta a gastar perres en fueos artificiales qu’en dir al megollu del problema. Dalgunes «Perres pal bable», (cada añu menos), pero, por supuestu, nada de derechos llegales, nada de campañes de dignificación, nada de solucionar el problema del asturianu na enseñanza, nada d’usar la toponimia que se va oficializando, nada de facer una programación n’asturianu cuidada y planificada na radiotelevisión pública, nada de falar n’asturianu nos actos oficiales… ¿Pue entendese qu’un presidente o una conseyera de Cultura nun tean presentes nos actos institucionales que festexen l’idioma y la lliteratura propies? Equí sí, equí ye lo normal. 

Eso provoca muncha frustración y impotencia y hasta hailu qu’echa la culpa al propiu movimientu de reivindicación, que nun dialoguemos, que fomos maximalistes, que nun supiemos llegar a la xente, qu’en realidá a naide-y interesa la recuperación del asturianu. 

Naide meyor que nosotros sabe de los nuestros errores. Na Xunta, por exemplu, llevamos más de trenta años trabayando pol asturianu. Y podemos dicir que probemos de too. Pasaron peles nuestres files cientos de persones con idees nueves, fiximos acciones de protesta (dende manifestaciones a encadenamientos, pasando peles clases na cai o les caravanes), promoviemos plataformes, publiquemos propuestes en tolos campos (na normalización nos conceyos, na enseñanza, na programación de la televisión y nel doblaxe, nel mundu de la sidra…), fiximos cursos d’alfabetización, charles, campañes de normalización en tolos ámbitos, traducciones, discos, conciertos, denuncies y reclamaciones alministratives, viaxes, entrevistes con montones de políticos y instituciones…Y vamos siguir faciéndolo.

Nosotros, como parte del pueblu asturianu tenemos la responsablidá que nos toca. Pero la responsabilidá mayor nun ye la de los que queremos cambiar esta situación inxusta y nun somos quién. Non. La responsabilidá tiénenla los partíos que gobernaron y que gobiernen. Son ellos los que nun punxeron soluciones cuando teníen y tienen los medios pa facelo.

 

Tenemos nel horizonte unes elecciones que puen cambiar esti panorama continuista y tristayu que lleva al asturianu a desapaecer. Les encuestes dicen que se pue abrir un escenariu políticu nuevu. Si eso se confirma, hai que poner enriba la mesa la reforma estatutaria pa incluyir la oficialidá. Una fuercia política que fale d’igualdá de derechos y que nun quiera ser corresponsable de la desaparición de la llingua asturiana tien que tomar partíu. Esi ye’l puntu de partida, non el de llegada. Depués yá vendrá, ha venir: un plan de normalización y una política planificada de recuperación llingüística.

Como en toles convocatories electorales, la Xunta tien que pidir a tolos partíos y agrupaciones electorales un compromisu claru col idioma. Tamién nel usu na propaganda. Por eso vamos valorar positivamente que l’asturianu nun seya un adornu politicamente correctu, una traducción al llau pa quedar bien. L’asturianu nun ye una llingua inintelixible pa los asturianos. Namás quien tenga prexuicios ye incapaz a lleer un testu n’asturianu. L’asturianu necesita una discriminación positiva porque si non tamos condenando a la versión n’asturianu a que naide faiga l’esfuerciu de lleela. Polo tanto, pidimos un usu planificáu del asturianu en tola propaganda, nos documentos electorales, nes intervenciones públiques. Si creyemos que l’asturianu tien que ser una llingua normal n’Asturies, tenemos que facer por que seya normal usándola, non solo respetándola.

Estes selmanes d’atrás, vimos como’l Partíu Popular votó en contra del asturianu tanto nel Congresu del estáu como na Xunta Xeneral…en contra de coses, como la Especialidá en Primaria y Secundaria, ¡que llevaben en programa!, o contra una propuesta de Gaspar Llamazares pa que se pidiere a la Real Academia Española que cambiare les definiciones de «asturianu» nel so diccionariu y punxere «llingua» en cuenta de «dialectu». Viendo eses posiciones cavernícoles de la derecha, hai que pensar que nun ye poco qu’al asturianu-y tengan respetu. Pero eso nun ye abondo. Col respetu namás nun se recupera una llingua. 

 

 

Y agora, falando de posiciones cavernícoles, ye bon momentu pa comentar dellos aspectos de la ganadora del Madreñazu 2014, la CONCAPA y la so representante n’Asturies, Sandra Ruiz. El xuráu yá apuntó certeramente les causes del premiu, pero convién esbillar una de les sos frases, porque exemplifica a les clares la ideoloxía d’esa organización desgraciadamente compartida pola mayoría de la nuestra clas dirixente actual: «Respetamos la llingua y no tenemos nada en contra, pero con ella no vamos a ningún lado». Esta sentencia resume’l clasismu ranciu y acomplexáu d’un sector minoritariu de la sociedá asturiana pero que siempre alcuentra altavoces en dellos medios de comunicación, que non solo faen de caxa de resonancia d’estos fans del apartheid llingüísticu, sinón que mesmamente marquen les llinies qu’hai que siguir nes sos campañes sistemátiques contra la enseñanza, la toponima o cualquier cosa que-yos estropie la visión reduccionista y cosmopaleta d’Asturies.

 

Pero, afortunadamente, tolos años nesti actu tenemos tamién la oportunidá de falar de coses positives, d’ilusión y de futuru. Esos valores encárnalos mui guapamente l’Asociación merecedora del Pegollu del 2014. Reciella (Families pol asturianu) llegó nel momentu xustu, nel momentu necesariu. Les persones qu’echaron a andar Reciella medraron nestos años nos que, pela primer vez, hebo una visión coherente, autónoma y digna del fechu llingüísticu y cultural asturianu. Y agora, llegáu’l momentu de la maternidá y paternidá, asumieron con compromisu y convencimientu’l llabor de tresmitir la cultura y la llingua a les xeneraciones más nueves, cola seguranza de qu’una Asturies que conoza, respete, use y valore la so llingua va ser una Asturies meyor, más abierta, más llibre y con más oportunidaes.

A pesar de ser una asociación creada va poco yá se pueden contar por decenes les actividaes que vienen llevando alantre: cursos, talleres, materiales, xuegos, conciertos, etc., amás de les más que pertinentes reflexones sobre cómo tendría que ser el sistema educativu asturianu pa nun maltratar al asturianu o pa que nun sía invisible como nel periodu fundamental de 0 a 3 años.

Por too esto, nun nos queda más qu’espresar el nuestru agradecimientu fonderu a toles persones y familes que participen del llabor de Reciella y animalos a siguir trabayando como hasta agora y a siguir abriendo la nuestra llingua al futuru.

 

Y agora, yá pa acabar, prestábanos volver a agradecevos la presencia nesti actu y convocavos pal añu que vien. Y tamién animavos a facer d’esti añu qu’entra un añu importante pa la reivindicación al traviés de la llucha, l’esfuerzu y el compromisu col idioma. Yá valió de nun tener derechos, nin futuru. Ye’l momentu, más que nunca, de facer que la movilización dexe bien claro que nun nos vamos dar, que na nueche y nel escaecimientu van quedar los qu’impidan un futuru nuestru, un futuru n’asturianu.

¡L’asturianu, llingua oficial!

¡Puxa Asturies!