La Xunta pola Defensa de la Llingua Asturiana (XDLA) valora de forma mui negativa’l determín de la Xunta Asesora de Toponimia del Principáu d’Asturies (XAT) de proponer al Conceyu de Carreño una forma doble pa Quimarán y El Pieloro, de manera que seríen oficialmente Quimarán/Guimarán y El Pieloro/Piedeloro. Pa la organización en defensa de los derechos llingüísticos ye un pasu atrás grave la modificación de formes que yá son oficiales dende’l 2005, sobre too cuando la propuesta de forma doble vien dende la mesma XAT, creada pa recuperar de manera rigorosa la forma tradicional de los nuestros nomes de llugar.
De magar empezó’l procesu de recuperación de la toponimia tradicional nel 2004 foron munchos los conceyos que dieron el pasu de recuperar la forma popular na que los vecinos nomaron los sos llugares. Precisamente, foron los conceyos de Carreño, Llanes y El Franco los primeros de toa Asturies en ver oficializada la so toponimia tradicional al traviés d’un decretu publicáu nel BOPA en mayu de 2005. Hai que recordar que’l procesu de recuperación de los nomes tradicionales nun parte namás del criteriu de la XAT. Ella ye la institución encargada d’asesorar a l’Alministración sobre la toponimia del país, pero depués ye’l Conseyu de Gobiernu’l que dictamina la forma oficial, teniendo en cuenta los dictámenes de la propia Xunta de Toponimia, de los conceyos implicaos y les aportaciones de los ciudadanos, al traviés d’un periodu de consulta, como se fixo nel casu de Carreño. L’espediente de Carreño, al nun alcontrar oxeción nenguna, aprobóse ensin problema.
Sicasí, agora, y gracies a la campaña de manipulación de dalgún mediu de comunicación que semó la confusión ente los vecinos y politizó un procesu que surdió del consensu y la necesidá de recuperar el nuestru patrimonio oral, la XAT decide apostar por una denominación doble. Amás, según la nota de prensa del Gobiernu, failo por considerar les dos formes tradicionales: Quimarán y Guimarán, y El Pieloro y Piedeloro. La Llei del Asturianu, y la práctica de la XAT, nun almite oficializar dos formes tradicionales d’un topónimu, sinón la forma tradicional y la forma acastellanada. Y, nel casu de Quimarán o El Pieloro, como bien demostró’l trabayu de campu de la propia XAT, eses son les formes teníes por tradicionales pola xente d’eses parroquies. Pa la XDLA, esti cambiu d’actitú y l’apueste por una forma doble pola XAT ye un pasu atrás que sema la confusión sobre’l procesu y qu’abre una vía ensin xacíu. Al recuperar la toponimia, si hai una campaña mediática en contra, con poner una forma doble, l’asuntu ta resueltu.
Dexa un Comentariu