La XDLA denuncia l’actitú asturfóbica de M. Bogomak, conceyal de Deportes de Siero

L’edil prohibió l’usu del nuestru idioma na camiseta oficial de la XXV Media Maratón

L’edil prohibió l’usu del nuestru idioma na camiseta oficial de la XXV Media Maratón

La Xunta pola Defensa de la Llingua Asturiana (XDLA) quier denunciar l’actitú asturfóbica de M. Mauricio Bogomak Medeiro, conceyal de Deportes, Seguridá Ciudadana y Rellaciones Institucionales del Conceyu de Siero, qu’acaba de prohibir l’usu del asturianu na camiseta oficial de la XXV Media Maratón de Siero, prueba qu’entra dientro del Campeonatu d’Asturies. Precisamente, son namás tres lletres que diferencien l’asturianu del castellanu de Campeonatu d’Asturies les que tanto cafien al conceyal y que valieron pa qu’echara’l diseñu de la camiseta p’atrás.

La situación ye tovía más grave cuando d’esta persona y de la so Conceyalía depende la Política Llingüística d’esti Conceyu. La XDLA entiende que ye bien difícil que se produza dalgún avance nesi sentíu si la persona que tien les competencies pa visibilizar el nuestru idioma tien tantos prexuicios hacia l’usu del asturianu. Ye de reseñar que nel campu de los deportes, el Conceyu de Siero vien faciendo, al traviés del Patronatu de Deportes, un usu normal de la llingua al traviés de la rotulación billingüe de los equipamientos deportivos, midíes que tuvieren l’aceptación pola xente de Siero.

Por too ello, la XDLA esixe una rectificación de M. Bogomak énte esta discriminación grave hacia los falantes d’asturianu y esti ataque al patrimoniu llingüísticu del país. Nun  pue ser que los sos prexuicios personales supongan un pasu atrás en dalgo que la ciudadanía de Siero yá acepta como dalgo normal.

Publicaciones Rellacionaes:

Éxitu d’audiencia de los doblaxes al asturianu de TPA La XDLA califica l’actitú totalitaria del PP d’ataque grave a los valores constitucionales qu’esti partíu diz defender La XDLA critica la incapacidá de la dirección de RTPA pa xestionar la programación