Esti 12 de xunu una delegación de la Xunta pola Defensa de la Llingua Asturiana (XDLA) tuvo presente ente’l públicu qu’asistió a la votación na Xunta Xeneral de la reforma del Estatutu d’Autonomía y la inclusión nél de la oficialidá. Del resultáu de la votación pue facese una llectura optimista porque nunca hubo tantos votos a favor en tola historia parllamentaria d’Asturies, pero la llectura realista ye que nun había la mayoría de 3/5 que se precisaba. Una parte de les fuercies de la derecha ta encantada nel so papel de supremacismu llinguísticu castellanista y la otra, quiciás menos sobreactuada, sigue na contradicción de dicir que respeta muncho la nuestra llingua, pero al empar niégase a reconoce-y l’estatus xurídicu que tienen otres llingües del Estáu, lo que lleva, de facto, a la desapaición progresiva d’esi patrimoniu que tanto dicen querer.
Llevamos cuasi cuatro décades reclamando na cai la oficialidá. Nos movimientos sociales que lleven tantu tiempu lluchando por un derechu ciudadanu básicu ensin que se llogre, siempre apaez el debate ente’l posibilismu y el maximalismu, anque les más de les veces ye una cuestión más bien de coxuntura o d’oportunidá política. Nel movimientu de reivindicación llingüística sabemos d’eso. Ye evidente que naide pue refugar cualquier avance en política llingüística. Na XDLA siempre los emponderemos y mesmamente nós, como organización, fiximos munches veces d’axentes de normalización en campos como la música, el comerciu, la hostelería, l’alfabetización d’adultos… cuando’l Gobiernu asturianu nun cumplía esi papel. Pero la nuestra obligación como organización social ye la llucha por un derechu básicu: la igualdá énte la llei pa los falantes d’asturianu (y, por solidaridá y coherencia democrática, pa los falantes de gallego-asturianu). Agora nun la hai y depués de la votación del 12 de xunu va siguir ensin habela.
La conocida como Llei del Bable, aprobada en 1998, llegó como contrapartida al fracasu de la posibilidá que s’abriera de que los dos partíos mayoritarios aceptaren reformar l’Estatutu incluyendo nél la oficialidá. Esa llei dio pie a qu’empezara’l procesu de recuperación toponímica y garantizó polo menos el derechu pa la ciudadanía de dirixise n’asturianu a les Alministraciones. Agora paez que se vuelve a repetir la mesma secuencia. Como nun se pudo llograr la oficialidá, a otru día ofrécennos una Llei del Bable, versión 2.0. Amás, quieren que s’apruebe col consensu de PP y Foro, colo que nun paez que los avances vaigan ser munchos cuando estes dos fuercies tan tán enfotaes na bondá de la Llei del Bable actual. Tenemos mieu que pa lo único que valga seya pa entamar más comisiones, más comparecencies, más debates, más tribunes… y más campañes mediátiques de la hinchada intolerante. Al final, lo único nuevo que va trayer esa Llei remocicada va ser cambiar llegalmente’l nome al gallego-asturianu, una obsesión etnófoba que les fuercies polítiques van aceptando mansamente ensin reparos. Y pa esi viaxe nun facíen falta les alforxes.
Paeznos innecesario dar más vueltes al marcu xurídicu de segunda categoría que yá tenemos. Sí, el marcu actual ye meyor que’l marcu xurídicu de tercer categoría, que ye la inexistencia de marcu, pero ¿paga la pena buscar más gradaciones intermedies ente la non oficialidá que tenemos agora y la oficialidá que nun tenemos? Nun necesitamos que nos consuelen con una Llei del Bable 2.0 por esti fracasu nuevu na Xunta Xeneral, un fracasu, otra manera, que ye namás de los partíos políticos que nun foron quien a entendese, non del movimientu ciudadanu que pide un derechu básicu dende hai cuatro décades.
L’oxetivu agora ye siguir trabayando pa convencer a la parte menos acérrime de la derecha pa que, más pronto que tarde, entienda que la oficialidá ye la única vía llegal qu’hai pa tentar d’iguar la situación de sustitución llingüística que tamos viviendo en tiempu real. Mentanto, los partíos que defenden la oficialidá pueden facer tolo muncho que se pue facer dientro del marcu llegal que tenemos agora. Hai amás partíos que yá gobiernen, tanto a nivel autonómicu como local, y la so política llingüística ye, en munchos casos, inexistente. Cuando nin los parllamentarios que defenden l’asturianu y el gallego-asturianu los usen públicamente, cuando los conseyeros y directores xenerales d’esi Gobiernu tan favorable nunca falen neses llingües, cuando los conceyos que gobiernen nun faen nada por elles nin nelles, esos cantos en favor de lleis nueves suénennos a distracción, a fueos artificiales. Hai munchu llabor que facer, que nun se fai y que podía facese mañana ensin falta de más comisiones nin grupos d’análisis, namás con voluntá política real.
Dexa un Comentariu