La XDLA denuncia otru casu de discriminación llingüística.

Dende la Xunta pola Defensa de la Llingua Asturiana (XDLA) queremos denunciar un casu nuevu de discriminación pol usu del asturianu. El Conceyu de Colunga refugó l’escritu d’una asociación local, La Llastra, por tar escritu n’asturianu si nun presenten tamién la traducción al castellanu. Esta decisión básase nuna interpretación mui restrictiva de la llei, que garantiza en teoría a la ciudadanía la posibilidá de presentar escritos n’asturianu a les Alministraciones. El casu de Colunga confirma lo que llevamos denunciando dende hai décades: ensin oficialidá, nun hai garantíes reales pal exerciciu de los derechos llingüísticos.

Munchos partíos políticos ufierten nos sos programes electorales un compromisu cola protección y la dignificación de la llingua asturiana, ente ellos Foro Asturias, que gobierna’l Conceyu de Colunga. Nestes selmanes últimes, al calor de la propuesta de reforma del estatutu, volvimos a ver declaraciones d’unos pidiendo la oficialidá y d’otros pidiendo la reforma de la Llei d’Usu o defendiendo l’eslogan imposible de «oficialidá non, asturianu sí». Sicasí, la realidá quíta-yos la mázcara a tantes bones palabres: los gobiernos municipales siguen negando escritos n’asturianu, esmantelen Servicios de Normalización Llingüística, incumplen sistemáticamente la toponimia oficial y inoren dafechu l’asturianu nes sos comunicaciones, redes sociales y imaxe institucional.

La Llei d’Usu, que munchos defenden como instrumentu abondu pa garantizar l’usu llibre del asturianu, ye na práctica papel moyao. La so aplicación parcial, cuando non restrictiva, dexa a la ciudadanía ensin la posibilidá de dirixise a l’Alministración na so propia llingua. Casos como’l que denunciamos güei en Colunga son un exemplu más qu’evidencia la necesidá urxente d’un marcu xurídicu que dea garantía efectiva a los derechos llingüísticos de la ciudadanía.

Esiximos un cambiu real, compromisos firmes, más allá de declaraciones, programes electorales y promeses incumplíes. L’asturianu nun puede siguir siendo una llingua de segunda pa les Alministraciones, que precisamente son les que tien qu’asegurar la so supervivencia. La oficialidá ye la única vía pa que los derechos llingüísticos pasen de les bones intenciones a los fechos.

Animamos a la ciudadanía a siguir denunciando esti tipu de discriminaciones y a reivindicar el so derechu a vivir n’asturianu.