La Xunta pola Defensa de la Llingua Asturiana considera engañoses les declaraciones de la Conseyera Ana González.

Tres les declaraciones de la titular de la Conseyería d’Educación, Ana González, nes qu’afirmaba que “l’asignatura de Llingua Asturiana va ser ufiertada de forma obligatoria en tolos centros”, la Xunta pola Defensa de la Llingua Asturiana considera que les sos palabres non solo son insuficientes sinón que son engañoses porque nun especifica les condiciones nes que va tar presente depués d’aplicar la nueva reforma educativa.

 

Teniendo en cuenta’l contestu nel que nos atopamos, podría dase la circunstancia de qu’en Primaria dexara de ser una asignatura voluntaria (situación na que s’atopa anguaño) y pasara a ser optativa, compitiendo con otres asignatures como Música o Francés y incumpliendo d’esta forma la Llei d’Usu y Promoción del Asturianu. Nel casu de Secundaria, anguaño optativa compitiendo con Francés (y incumpliendo tamién la Llei d’Usu y Promoción del Asturianu), pasaría a facelo con asignatures como Música, Plástica o Tecnoloxía, amás de les segundes llingües estranxeres.

 

Dende la Xunta pola Defensa de la Llingua Asturiana sabemos que la solución a esti problema que plantea la LOMCE ye bien cenciella: declarando la oficialidá del idioma y creando la especialidá de Llingua Asturiana taría garantizáu’l so estudiu en tolos niveles.